«Jak u Amierycy nam nie treba». Što kažuć padčas «usienarodnaha» abmierkavańnia Kanstytucyi ŭ rehijonach
Novy hod u funkcyjanieraŭ pačaŭsia z hastrolaŭ. Kožny dzień jany sustrakajucca z rabočymi i biudžetnikami, kab abmierkavać novy prajekt Kanstytucyi, jaki vyniesuć na refierendum užo ŭ lutym. Dla ŭsich rajonak ciapier heta tema numar adzin. Pačytaješ — nibyta na mašynie času traplaješ u Saviecki sajuz: sabralisia tavaryšy, kab padtrymać kurs dziaržavy, adspravazdačylisia i razyšlisia. Ale čas ad času traplajucca i prapanovy, sabrali niekatoryja ź ich.
Rabočyja ŭ Kryčavie prapanujuć zabaranić być prezidentam paśla 70 hod
U Kryčavie miascovaja deputat razam ź milicyjanieram pryjšła abmiarkoŭvać źmieny ŭ Kanstytucyju da rabočych darožna-ekspłuatacyjnaha ŭpraŭleńnia.
Pytańni ŭźnikli da artykuła 80, jaki vyznačaje kryteryi da kandydata ŭ prezidenty. Tak, prapanoŭvajecca pavysić minimalny ŭzrost z 35 da 40 hod. Adznačym, što Łukašenka pa takich kryterach nie moh by bałatavacca, jamu ŭ 1994-m było 39.
Ale kryčaŭskija rabočyja ličać, što «jak u Amierycy nam nie treba», prosiać prapisać i maksimalny ŭzrost — prezidentam nie moža być čałaviek, starejšy za 70 hod.
Fota krichevlive.by
«A to voś amierykanski prezident… Hańba niejkaja: to śpić, to z trapa samalota ŭžo spuścicca nie moža. Jaki ź jaho kiraŭnik», — ahučyli ŭdzielniki abmierkavańnia.
Łukašenku, nahadajem, ciapier 67 hod. Pucin sioleta adznačyć 70-hadovy jubilej. Prezidentu ZŠA Džo Bajdenu — 79 hod.
Kryčaŭskaja rajonka piša, što deputatka Iryna Prudnikava pryniała zaŭvahu i paabiacała pieradać jaje ŭ Nacyjanalny centr pravavoj infarmacyi, jaki źbiraje mierkavańni pa źmienach u Kanstytucyju.
U Rahačovie prosiać zabaranić brać šlub tym, chto źmianiŭ poł
Kiraŭnik Savieta respubliki Natalla Kačanava raskazvaje, što pastupaje šmat prapanovaŭ nakont punkta ab tradycyjnym šlubie. U Kanstytucyju vyrašyli dadać udakładnieńnie, što šlub mahčymy tolki pamiž mužčynam i žančynaj.
Dla čaho heta robicca, nichto z pradstaŭnikoŭ ułady tak i nie zmoh patłumačyć, hetaja norma daŭno isnuje ŭ Kodeksie ab šlubie, i nijakaj lehalnaj mahčymaści dla adnapołych šlubaŭ u Biełarusi i tak niama. Ale akazvajecca, na pryjom da Kačanavaj «prychodziać ludzi, jakija viarnulisia ŭ Biełaruś ź inšych krain dziela taho, kab vyratavać svaich dziaciej».
«Nie tak usio prosta i dobra ŭ jeŭrapiejskich krainach. I kaštoŭnaści, jakija tam ukaraniajucca, nieprymalnyja dla Biełarusi. Jany viarnulisia siudy i žadajuć žyć u hetaj krainie», — kaža deputatka.
Fota slova.by
Žychary Rahačova prapanujuć pajści jašče dalej, dapisać u Kanstytucyi, što šlub dazvoleny pamiž mužčynam i žančynaj tolki ad naradžeńnia, to-bok źmianiŭ poł — nie možaš zarehistravać svaje adnosiny. Pry źmienie poła čałaviek atrymlivaje novy pašpart, dzie naturalna nie ŭkazvajecca jahony papiaredni poł.
Vidać, žychary Rahačova pra heta jašče nie viedajuć. Źmiena poła ŭ Biełarusi mahčymaja tolki pa rašeńni admysłovaj kamisii, kudy ŭvachodziać miedyki, jaki detalova razhladajuć kožny vypadak, heta davoli redkaja źjava.
Jašče Kačanava zajaviła, što sprečna ŭsprymajecca punkt u Kanstytucyi, dzie prapisana, što kožny musić kłapacicca pra svajo zdaroŭje.
U Červieni lidar prafsajuza ličyć, što novaja Kanstytucyja vyrašyć prablemu ź niepažadanymi esemeskami
Staršynia rajonnaha prafsajuza ŭ Červieni praviała sustreču z rabotnikami vuzła elektrasuviazi. Volha Kocina źviarnuła ŭvahu na artykuł 28 Kanstytucyi, pavodle jakoha dziaržava stvaraje ŭmovy dla abarony piersanalnych danych, biaśpieki asoby i hramadstva i pry ich vykarystańni.
Fota cherven.by
«Usie my padpisanyja na internet- i sms-rassyłki ab źnižkach i akcyjach, a ŭ kramu prychodzim ź viejeram źnižkavych kart, dobraachvotna pakidajučy piersanalnyja danyja, telefon, elektronnuju poštu i inšyja rekvizity navat na kasie kramy, — cytuje prafsajuznaha lidara hazieta «Rajonny vieśnik». — Niekatoryja niadobrasumlennyja apieratary suviazi, ahienctvy nieruchomaści i inšyja arhanizacyi «źlivajuć» danyja svaich klijentaŭ i navat vytrymki z kadastraŭ pa pieršym patrabavańni «zakazčykaŭ». Uśviedamleńnie adkaznaści za parušeńni normaŭ Kanstytucyi, pavinna ich spynić».
Pakul novaja Kanstytucyja nie pryniataja, nahadajem, što lepš nie pakidać svaje danyja nienadziejnym krynicam, taksama možna adpisacca i zabłakavać spam-rassyłku, a jašče ŭ Biełarusi pryniaty zakon ab piersanalnych danych, jaki ŭžo rehuluje hetyja pytańni.
Hrodzienskija kamunisty patrabujuć zamacavać daminavańnie dziaržaŭnaj ideałohii
U Hrodnie abmierkavać novuju Kanstytucyju sabralisia kamunisty. Jak paviedamlaje hazieta «Pierśpiektyva», kamunist Jahoryčaŭ prapanavaŭ dadać asobny artykuł «Ab roli i značnaści pracoŭnych kalektyvaŭ u raźvićci našaj krainy». A taksama padkreśliŭ nieabchodnaść dapoŭnić artykuł 15, dzie padkreślivajecca zachavańnie histaryčnaj pamiaci i praŭdy słovami «i savieckaha pieryjadu historyi».
Fota rgazeta.by
A kamunisty Harbačova i Jendžejeŭskaja vystupili kateharyčna suprać uviadzieńnia raznastajnaści ideałohij — «u Kanstytucyi pavinna być dakładna prapisana daminavańnie adzinaj dziaržaŭnaj ideałohii».
«Našu historyju nie pierapisać nikomu»
Mnohija načalniki na sustrečy z rabočymi padkreślivajuć, što ŭ novaj Kanstytucyi budzie zamacavana abarona histaryčnych kaštoŭnaściaŭ, ale razmova viadziecca vyklučna pra adnu temu — Vialikaja Ajčynnaja vajna.
Fota polese.by
«Usie my viedajem, što Biełaruś najbolš paciarpieła ŭ hady Vialikaj Ajčynnaj vajny. I tuju praŭdu, a vajavali i maje dva dziady, siońnia chočuć apahanić», — zajaviŭ staršynia Biełaruskaha prafiesijnaha sajuza ahrapramysłovaha kompleksu Vasil Chvacik na sustrečy z supracoŭnikami fiermy ŭ Stolinskim rajonie.
Chto i jak choča apahanić praŭdu, prafsajuzny lidar nie ŭdakładniŭ, ale dadaŭ: «Našu historyju nie pierapisać nikomu. I heta budzie abaroniena Kanstytucyjaj. Ludzi heta ŭchvalajuć, razumiejuć. Liču, što novaja Kanstytucyja, jakaja budzie pryniataja na refierendumie, heta padmurak stabilnaści našaj Biełarusi».
Na Stolinščynie abmierkavańnie Kanstytucyi sumiaścili z vynikami konkursa «Naš žyviołavod». Jak pišuć «Naviny Paleśsia», najlepšyja dajarki «buduć sahravacca zimovymi viečarami pad ciopłymi pledami, a zahadčycy fiermy ŭručyli dakumienty na pralnuju mašynu, jakaja vielmi nieabchodna ŭ haspadarčaj dziejnaści».
Apublikavali prajekt źmien u Kanstytucyju Biełarusi. Što tam novaha?
Što nie tak z vystupam Łukašenki na pasiadžeńni pa histaryčnaj palitycy? Mierkavańnie
