Maryja Kaleśnikava ŭ kałonii płanuje atrymlivać vyšejšuju adukacyju
Maryja Kaleśnikava ŭ homielskaj kałonii, kudy jaje etapavali 9 studzienia, pakul znachodzicca ŭ karancinnym atradzie ź piaci čałaviek. Pra heta raspavioŭ DW advakat palitźniavolenaj Uładzimir Pylčanka.
Fota Reuters
— Jana sama ŭ paradku, jak zaŭsiody badzioraja, z čyrvonaj pamadaj, śmiajecca, uśmichajecca, — raspavioŭ Pylčanka. — Ciapier jana ź ludźmi — kala dziesiaci miesiacaŭ jana była ŭ kamiery-adzinočcy i nie mieła mahčymaści kantaktavać ź ludźmi, akramia svaich advakataŭ, redkich sustreč z baćkam i słužbovymi asobami ŭ SIZA.
Ciapier jana znachodzicca ŭ atradzie ź piaci čałaviek, heta atrad № 8, karancinny. Jak jana raspaviadała, atmaśfiera vielmi stanoŭčaja, śmiajucca, viesialacca — narmalnaja atmaśfiera z punktu hledžańnia Maryi, — kaža Pylčanka.
Pavodle jaho słoŭ, etap prajšoŭ dosyć chutka — jon doŭžyŭsia mienš za sutki. Maryja ŭ karancinie budzie znachodzicca nie bolš za 14 sutak, zatym jaje pavinny pieravieści ŭ zvyčajny atrad. Pakarańnie jana budzie adbyvać na ahulnych umovach, pracujučy ŭ kałonii. Tam Kaleśnikava choča atrymać vyšejšuju adukacyju. Takaja mahčymaść prapisanaja ŭ zakanadaŭstvie, raskazvaje advakat.
— Jość dźvie VNU, jakija mohuć davać adukacyju. < … > Viadoma, jana ź cikavaściu pastaviłasia da hetaj idei, i sama budzie šukać infarmacyju, što za VNU i jakim čynam [pastupić tudy].
Advakat taksama raspavioŭ, što apielacyju na prysud jany ŭžo padavali — druhaja sudovaja instancyja pakinuła jaho bieź źmien. Kaleśnikava z advakatami płanuje abskardžvać prysud i dalej, vykarystoŭvać usie «lehalnyja miechanizmy dla jaho admieny».
Nahadajem, što kiraŭnicu štaba Babaryki Maryju Kaleśnikavu 6 vieraśnia 2021 hoda asudzili na 11 hadoŭ kałonii.
