Dvuch žycharoŭ Minska zatrymali za vostryja kamientary na adras biełaruskich vajskoŭcaŭ u Kazachstanie
Supracoŭniki milicyi zatrymali dvuch minčan za kamientary na adras biełaruskich vajskoŭcaŭ, što dniami nakiravanyja u Kazachstan u składzie sił ADKB. «Pakajannaje» videa źjaviłasia ŭ tielehram-kanale MUS.
Zatrymanyja minčanie 30 i 32 hadoŭ — biespracoŭnyja, paviedamili ŭ milicyi. Na videa abodva raspaviadajuć, što publikavali kamientary ŭ sacsietkach, i abiacajuć vydalić ich.
Ciapier krytyčna vykazvacca na adras siłavikoŭ u internecie niebiaśpiečna. Raniej biełarusaŭ taksama ŭžo zatrymlivali tolki za kamientary. U pryvatnaści, za tyja, jakija tyčacca incydentu sa stralboj na vulicy Jakuboŭskaha ŭ Minsku, padčas jakoj zahinuŭ supracoŭnik biełaruskich śpiecsłužbaŭ. Tady, pavodle źviestak pravaabaroncaŭ, byli zatrymanyja bolš za 200 čałaviek, 136 ź ich uziatyja pad vartu.
Dniami stała viadoma pra prysud adnamu z takich zatrymanych: žychar Mahilova atrymaŭ dva hady kałonii pavodle artykuła ab publičnaj abrazie.
A jašče raniej zatrymlivalisia ludzi, jakija pakidali niespačuvalnyja kamientary na adras biełaruskich lotčykaŭ, jakija zahinuli ŭ katastrofie pad Baranavičami 19 maja 2021 hoda.
Łukašenka nazvaŭ uvod sił ADKB u Kazachstan dobrym precedentam
Stała viadoma, jakija biełaruskija vajskoŭcy adpravilisia ŭ Kazachstan
