Šatłandziec, viadučy ekśpiert pa viski, užo 20 miesiacaŭ siadzić u strohaj samaizalacyi, bo baicca zhubić niuch
U kožnaha dziasiataha z tych, chto pierastavaŭ adčuvać pachi padčas kavidu, niuch nie adnaŭlajecca navat praź niekalki tydniaŭ. Skažonaje uspryniaćcie pachaŭ, ci paraśmija, moža stać sapraŭdnym praklonam dla niekatorych ludziej, čyja praca — niuchać ci kaštavać. Pra toje, jak ekśpiert pa viski ratujecca ad kavidu i mahčymaj paraśmii, raskazvaje BBC.
Fota: depositphotos.com
Z sakavika 2020 hoda Błer Boŭman vychodzić sa svajho doma ŭ Edynburhu tolki na samotnyja špacyry i ŭ kramu.
Da pandemii jon jeździŭ pa ŭsim śviecie pa pracy — ciapier ža ŭsie spravy viadzie vyklučna anłajn.
«Ryzyki ciapier prosta zanadta vysokija dla mianie», — pryznajecca Błer.
Jon ad pačatku sačyŭ za daśledavańniami, źviazanymi sa strataj niuchu, i moh sabie ŭjavić, čym heta pahražaje jamu jak ekśpiertu pa viski. A daśledavańni z časam vyjavili, što dla niekatorych z tych, chto pieranies kavid, miasa pachnie palivam. Vodar kavy zdajecca nastolki brydkim, što ludziej vanituje. Elitny viski pachnie prosta pavietram.
Kab nie stavić pad udar usiu svaju karjeru, Boŭman adchilaje sotni prapanovaŭ paŭdzielničać u afłajnavych mierapryjemstvach ci dehustacyjach. Ale pry hetym jaho biznes akurat ciapier kvitnieje, bo jon pravodzić šmat mierapryjemstvaŭ praz Zoom.
Kali Šatłandyja zakryłasia na pieršy łakdaŭn, u Błera byli zabraniravanyja kvitki na mierapryjemstvy ŭ Narviehii, Japonii, Makaŭ, Hanie, ZŠA, Abjadnanych Arabskich Emiratach i Kitai. Jaho pracaj było znachodzić cebry staroha i redkaha viski dla pryvatnych klijentaŭ i ładzić dehustacyjnyja sesii. Boŭman skasavaŭ usie damoŭlenaści viasnoj 2020 hoda. Ale navat kali Šatłandyja pačała vychodzić z łakdaŭna, Boŭman vyrašyŭ zastacca ŭ samaizalacyi: «Ja prosta nie mahu pracavać jak raniej, i nie płanuju hetaha rabić u ahladnaj budučyni, ažno pakul navuka nie daść jasnych adkazaŭ pra ŭsie ryzyki».
«Ja vychodžu ŭ horad tolki raz na tydzień, zabrać pakupki z supiermarkieta, i toje zastajusia na adlehłaści, na parkoŭcy: supracoŭniki ŭžo dobra viedajuć mianie, tamu pakidajuć cialežku z praduktami na parkoŭcy i sychodziać. I tolki kali jany syduć, ja zabiraju pradukty i źjazdžaju», — raskazvaje Błer pra svaje budni.
Užo dvaccać miesiacaŭ Błer nie chodzić u kaviarni ci restarany: jon kaža, što adčuvaŭ by siabie tam prosta nievierahodna niaŭtulna, uličvajučy ŭsie ryzyki.
Błer raskazaŭ i pra adnaho sa svaich kaleh, taho samaha, što čuje tolki pach čystaha pavietra, kali pje viski Islay.
«Kali vy kaštavali hety viski, Islay, vy viedajecie, što jon musić pachnuć torfam, dymam i lekami», — raskazvaje Błer. Jaho pryhałomšvaje sama dumka, što možna adnojčy paniuchać viski i nie adčuć nijakaha vodaru.
U miedycynie fienomien skažonaha adčuvańnia pachaŭ nazyvajecca paraśmijaj. Prykładna 90% ludziej, jakija pierastavali adčuvać pachi padčas kavidu, za tydzień ci dva adnaŭlali svoj niuch. Astatnija ž niekalki miesiacaŭ naohuł nie adčuvali ničoha, a niekatoryja pačynali ŭsprymać vodary zusim pa-inšamu, skažona. I hety skažony niuch moža zastacca ź imi nazaŭsiody.
Heta nie tak i lohka sabie ŭjavić. Znajomyja vodary — kavy, śviežaha chleba, škvarak — mohuć raptam padacca strašna brydkimi i vyklikać ahidu. A ŭsio heta źviazana z tym, što orhany niuchu niapravilna sčytvajuć sihnały. Z hetym nievierahodna ciažka žyć.
My prymajem niuch jak naležnaje i nie cenim jaho jak musim canić, kaža Sara Oŭkli, dyrektarka dabračynnaj arhanizacyi AbScent. Pry hetym ludzi, jakija hublajuć niuch, našmat bolš schilnyja da depresii i pieryjadaŭ kiepskaha nastroju.
«Urešcie, — dadaje Oŭts, — niuch zakranaje ŭsie śfiery našaha žyćcia. Jon naš hałoŭny pamočnik u navihacyi pa hetym śviecie».
Jak nie chvalavacca i nie vyharać. Parady psichołaha praduktyŭnaści, jaki vykładaje amierykanskim vajskoŭcam
Jak zmahacca z zaležnaściu padletkaŭ ad videahulniaŭ? Rajać sami padletki
Jak spynić vypadzieńnie vałasoŭ paśla kavidu?
