Jak zmahacca z zaležnaściu padletkaŭ ad videahulniaŭ? Rajać sami padletki
Heta nie prosta hulni, papiaredžvajuć darosłych usiaho śvietu amierykanskija tynejdžary. Heta virtualnaja prastora, dzie čałaviek vučycca pracavać u kamandzie, vybudoŭvaść stratehii, stanavicca lidaram. I tam nie biessensoŭnyja čaty ź siabrami — tam ceły novy śviet sacyjalnych adnosinaŭ. Parady baćkam hulcoŭ ad padletkaŭ-hulcoŭ sabraŭ WSJ.
Fota Pixabay.com
«Samaje prykraje — heta kali baćki spyniajuć hulniu biez papiaredžańnia», — skardzicca Mećju, zhadvajučy svaje padletkavyja hady. Ciapier jamu ŭžo 18 i jon vučycca ŭ palitechničnym univiersitecie ŭ Kalifornii.
15-hadovy Džonatan z Memfisa nahadvaje, što jość vialikaja roźnica miž niezdarovaj apantanaściu videahulniami i zdarovaj apantanaściu videahulniami.
Znajści bałans ciažka, i baćkam treba prykłaści nie mienš namahańniaŭ, čym padletkam dla hetaha. Bo čaściej za ŭsio bitva suprać hulniaŭ zakančvajecca tym, što dziciaci nie pakidajuć ni vybaru, ni mahčymaści kantralavać svoj ułasny čas. A adčuvańnie, što ty možaš sam vybirać zaniatak i sam kiruješ svaim časam — vielmi važnaje dla ŭsich, i małych, i darosłych.
Jak ža harmanična ŭpisać videahulni ŭ siamiejnaje žyćcio, a taksama jakim praviłam biaśpieki varta navučyć kožnaha?
Budzilnik i raskład
Dazvolcie padletkam uziać adkaznaść za toje, jak jany raźmiarkujuć svoj čas miž hulniami i žyćciom. U ich heta cudoŭna atrymajecca, da taho ž, heta budzie vydatny navyk na budučyniu.
Naprykład, parajcie dzieciam samim pisać sabie raskład na dzień. I samim ža zavodzić budzilnik, kab usio paśpieć.
Niechta z apytanych amierykanskich padletkaŭ dazvalaje sabie, pryjšoŭšy sa škoły, hulać cełuju hadzinu, ale kali źvinić budzilnik praz hadzinu, usio sumlenna chavaje i siadaje za damašku. Paśla viačery, kali ŭsio chatniaje na zaŭtra zroblenaje, jon moža jašče krychu pahulać.
Važna nie padmanvać ni siabie, ni baćkoŭ, kažuć niekalki maładych hulcoŭ. Bo, padmanuŭšy baćkoŭ, ciškom nahulaŭšysia ŭ hulni, ty tolki zhubiš davier siamji, i, mahčyma, sam užo nie zmožaš kantralavać svoj čas.
Chtości naadvarot spačatku chutka raspraŭlajecca sa školnymi zadańniami i tady ŭžo da samaha snu hulajecca. Ci jość jašče varyjant — stavić budzilnik na 15-chvilinnyja pierapynki pamiž setami hulni, i za hetyja pierapynki rabić školnyja zadańni. Azart daje dobry stymuł pracavać chutka.
Hałoŭnaje, padkreślivajuć niekalki chłopcaŭ, napisać sabie śpis, što treba za dzień zrabić, i zrabić heta, a reštu času sa spakojnym sumleńniem pryśviačać hulniam.
Padazronyja paviedamleńni ad nieznajomcaŭ
U mnohich hulniach z publičnych siervieraŭ dzicia moža atrymoŭvać paviedamleńni ad nieznajomych ludziej. Heta ŭ pryncypie niebiaśpiečna. Ananimy lubiać papałochać dziaciej pasłańniami kštałtu: «Ja viedaju, dzie ty žyvieš». Treba papiaredzić dzicia, kab jano adrazu błakavała takich hulcoŭ, paviedamlała pra ich i nie ŭstupała ź imi ŭ pierapisku.
Taksama važna nie vystaŭlać nidzie infarmacyju pra svaje staronki ŭ sacyjalnych sietkach — praź ich nieznajomcy mohuć vyviedać vielmi šmat infarmacyi pra hulca i karystacca joj.
Akaŭnt i źmiena parola
Padletki rajać darosłym navučyć svaich dziaciej, jak abaraniać akaŭnt ad uzłomaŭ. Varta prydumać vielmi zabłytany parol, a kali akaŭnt uzłamali, adrazu ž parol źmianić. I tak, paroli lepš zapisvać na papieru i chavać u nadziejnaje miesca.
Niechta mianiaje paroli raz na try miesiacy. I ŭ dadatak maje dvuchfaktarnuju aŭtentyfikacyju. I heta narmalna.
Nie kantralujcie dziaciej u pryncypie, nie tolki datyčna hulniaŭ. I pabačycie, što budzie
Zabirać kansol — zusim nie efiektyŭna, — pierakonvaje Mećju.
Zamiest hetaha lepš davać dziciaci ustanoŭku, što treba zrabić da kanca dnia — a jak jano heta zrobić, i kolki času pry hetym praviadzie za kansollu, chaj vyrašaje samo.
Razam sa svabodaj źjaŭlajecca bolš mahčymaściaŭ, nie źviazanych ź videahulniami, — kaža jašče adzin hulec sa stažam.
A značyć, kali dziciaci nie chapaje svabody, u jaho źjaŭlajecca našmat bolš spakusy zaniacca tym, što nie dazvalajuć. Kali ž svabody chapaje, jano samo znojdzie sabie inšyja zaniatki, pa-za kampjutarnymi hulnymi.
Hałoŭnaje — kab baćki vieryli ŭ svaich dziaciej.
Kłopat baćkoŭ. Čamu nie varta ščaście dziaciej stavić sabie za metu
Honar baćkoŭ za pośpiechi dziaciej. U čym tut pastka
