Viarchoŭny sud pryznaŭ terarystami «Kibierpartyzan» i jašče niekalki inicyjatyvaŭ
Viarchoŭny sud pryznaŭ terarystyčnymi inicyjatyvy «Supraciŭ», «Kibierpartyzany», «Družyny narodnaj samaabarony — DNS» i «Busły laciać», paviedamlaje Hienprakuratura.
Raniej biełaruskija ŭłady nie pryznavali svaich palityčnych praciŭnikaŭ «terarystami», tolki «ekstremistami».
Nahadajem, raniej hienieralny prakuror Andrej Švied nakiravaŭ u Viarchoŭny sud zajavu ab pryznańni niefarmalnaj arhanizacyi «Supraciŭ» (jak paviedamlajuć va ŭstanovie, u jaje ŭvachodziać telehram-kanały «Kibierpartyzany», «Družyny Narodnaj Samaabarony — DNS», «Busły laciać») terarystyčnaj ahanizacyjaj.
Pavodle danych prakuratury, hetaja arhanizacyja sfarmavanaja ŭ traŭni 2021 hoda. Jaje kiraŭniki — dvoje hramadzian Respubliki Biełaruś, jakija pražyvajuć na terytoryi Złučanych Štataŭ Amieryki.
Jak ličać u prakuratury, «klučavyja mety stvareńnia i dziejnaści farmiravańnia — abjadnańnie radykalna nastrojenych hramadzian dla nastupnaha schileńnia ich da ŭdziełu ŭ niesankcyjanavanych akcyjach pratestu ź siłavym procidziejańniem pravaachoŭnikam i ździajśnieńnia aktaŭ teraryzmu, dyskredytacyja orhanaŭ dziaržaŭnaj ułady i kiravańnia, hvałtoŭnaje źmianieńnie kanstytucyjnaha ładu respubliki».
Nazvanyja ŭ zajavie prakuratury telehram-kanały ŭžo pryznanyja ekstremisckimi farmavańniami.
Prakuraturaj užo raspačatyja i rasśledujucca kryminalnyja spravy pa artykułach 218 (źniščeńnie abo paškodžańnie majomaści), 289 (akt teraryzmu), 290 (pahroza ździajśnieńniem akta teraryzmu) Kryminalnaha kodeksa Respubliki Biełaruś, paviedamlajuć na sajcie viedamstva.
