MZS Hiermanii ŭznačalić prychilnica sankcyj suprać Minska i žorstkaha kursu adnosna Maskvy Analena Bierbak
Partyi-ŭdzielnicy budučaha ŭrada Hiermanii na čale z sacyjał-demakratam Ołafam Šolcam damovilisia ab padziele pasad u kabiniecie ministraŭ. MZS Hiermanii uznačalić sustaršynia «zialonych» Analena Bierbak, paviedamlaje niamieckaje telebačańnie.
U źniešniaj palitycy Bierbak maje reputacyju žorstkaha i paśladoŭnaha praciŭnika aŭtarytaryzmu. U tym liku «zialonyja» źjaŭlajucca najbolš aktyŭnymi krytykami aŭtakratyj u Minsku i Maskvie.
Jašče ŭ kancy maja Bierbak zaklikała pašyryć sankcyi ES suprać biełaruskich uładaŭ i ŭvieści štrafnyja miery ŭ dačynieńni da naftavaj haliny Biełarusi. Mienavita «zialonyja» byli najbolš aktyŭnyja ŭ publičnaj padtrymcy biełaruskaj hramadzianskaj supolnaści na fonie palityčnych represij u našaj krainie.
Bierbak (jak i inšyja «zialonyja») stavicca da Kramla dosyć naściarožana. Naprykład, jana nie padtrymlivaje zapusk «Paŭnočnaha patoku — 2». Na jaje dumku, hety prajekt «supiarečyć jeŭrapiejskim metam pa abaronie klimatu i ŭsim sankcyjam ES suprać Rasii». Bolš za toje, hazapravod «supiarečyć hieastratehičnym intaresam jeŭrapiejcaŭ, jon vyrazna nakiravany suprać Ukrainy».
Uviesnu 2021 hoda, kali Rasija ŭzmacniła svoj kantynhient na miažy z Ukrainaj, Bierbak prapanavała ŭ adkaz uzmacnić cisk na Maskvu. Kreml navat sprabavaŭ pieraškadžać pieradvybarnaj kampanii Bierbak. Dla hetaha vykarystoŭvalisia chakierskija ataki i dezinfarmacyja ŭ sacsietkach.