Paźbiehnuć Armahieddona. Upieršyniu čałaviectva nakiruje kaśmičny zond u serca asteroida, kab źmianić jaho trajektoryju
24 listapada NASA zapuskaje ŭ kosmas aparat, jaki budzie pavinien naŭmysna sutyknucca z asteroidam i pasprabavać źmianić jaho trajektoryju. Heta budzie pieršy raz, kali čałaviectva ŭmiašajecca ŭ trajektoryi abjektaŭ Soniečnaj sistemy.
Schiema palotu misii Dart. Krynica: nasa.gov.
Našu płanietu pastajanna bambardyrujuć asteroidy, ale ž zvyčajna jany vielmi maleńkija. Takija abjekty zharajuć u atmaśfiery abo razłomvajucca na častki da taho momantu, jak dasiahnuć ziamnoj pavierchni. Adnak zdarajecca, što vialikija asteroidy ŭsio ž nanosiać škodu Ziamli i jaje žycharam, piša Guardian.
Naprykład, navukoŭcy ličać, što mienavita sutyknieńnie płaniety z asteroidam mahło vyklikać vymirańnie dynazaŭraŭ 66 miljonaŭ hadoŭ tamu. Mierkavana, praz takoje sutyknieńnie ŭ atmaśfieru trapiła vielmi šmat pyłu i reštkaŭ asteroida. U vyniku soniečnyja pramiani pierastali traplać na ziamnuju pavierchniu, što pryviało da parušeńnia łancuhoŭ charčavańnia i, adpaviedna, da taho, što dynazaŭram prosta nie było čaho jeści.
Kali-niebudź anałahičny asteroid moža vyklikać kaniec śvieta i dla čałaviectva. Tamu tak važna znajści sposab pieraduchilić jaho sutyknieńnie z płanietaj. Adzin z varyjantaŭ heta zrabić — źmianić trajektoryju asteroida šlacham kantralavanaha sutyknieńnia jaho z kaśmičnym aparatam.
Ciapierašniaja misija Dart, jakuju NASA i budzie vypraboŭvać u sieradu, pakaža, ci źjaŭlajecca takoje sutyknieńnie realistyčnym varyjantam pieraduchilić Armahieddon. Navukoŭcy žadajuć pabačyć, ci moža kaśmičny aparat aŭtanomna nakiravacca da vyznačanaha asteroida i naŭmysna ŭrezacca ŭ jaho. Taksama ŭ NASA žadajuć pabačyć, nakolki źmienicca arbita asteroida paśla sutyknieńnia.
Meta aparata misii Dart — sistema asteroidaŭ Dzidzim, jakaja ciapier nie niasie škody dla Ziamli. Kali misija budzie paśpiachovaj, heta dakaža, što ŭžo siońnia čałaviectva maje techničnyja zdolnaści abaranić siabie ad sutyknieńnia z asteroidam.