Polšča zapłanavała pieršuju departacyju mihrantaŭ i ich pamahatych: spačatku vyšluć 20 čałaviek
Na hetym tydni Polšča płanuje departavać 10 mihrantaŭ i 10 arhanizataraŭ nielehalnaha pierasiačeńnia miažy. Pra heta ŭ paniadziełak paviedamiła pres-sakratar Pamiežnaj varty Polščy Hanna Michalska.
Straż Graniczna
Pa słovach Michalskaj, ciapier u śpiecyjalnych centrach dla mihrantaŭ znachodziacca 1240 hramadzian Iraka, 716 ź jakich źviarnulisia pa mižnarodnuju abaronu.
«Na hetym tydni my płanujem departavać kala 20 čałaviek, u asnoŭnym hramadzian Iraka i Irana, u tym liku 10 arhanizataraŭ niezakonnaha pierasiačeńnia miažy. Kraina pryznačeńnia, viadoma, Irak», — cytuje słovy Hanny Michalskaj Dziennik Gazeta prawna.
Na pytańnie nakont taho, kolki budzie čartarnych rejsaŭ z zamiežnikami i kali jany pačnuć vylatać, jana adkazała, što supracoŭniki pamiežnaj słužby «chacieli b arhanizavać jak maha bolš takich rejsaŭ».
«Pieršy rejs pakul u płanach, tamu ja nie budu kazać dakładna, kali jon budzie, tamu što tut heta zaležyć nie tolki ad nas, ale i ad Ministerstva zamiežnych spraŭ, i ad irakskaha boku, jaki pavinien pahadzicca pryniać svaich hramadzian», — adznačyła jana.
«My žadajem, kab na pieršym rejsie było kala 80 čałaviek. Čamu tolki 80? Pamiatajcie, što hetyja ludzi nie lotajuć u adzinočku.
Jany lotajuć z pradstaŭnikami niaŭradavych arhanizacyj, jość i achova pamiežnikaŭ. Kali hrupa składajecca ŭ asnoŭnym z mužčyn, naša achova pavinna być bolšaj. Kali heta siemji, my možam dazvolić sabie mienšuju achovu. Zvyčajna daktary taksama lotajuć», — patłumačyła pres-sakratar pamiežnaj słužby Polščy.
