Chrenin: Biełaruś chacieła b mieć «Iskandery», ale rasijskija vajskovyja bazy nie patrebnyja
Biełaruś chacieła b mieć u siabie rakietnyja kompleksy rasijskaj vytvorčaści «Iskander». Pry hetym u krainie niama patreby dadatkova raźmiaščać tyja ci inšyja rasijskija vajskovyja bazy, bo ŭ ramkach isnavańnia rehijanalnaj hrupoŭki vojskaŭ pamiž chaŭruśnikami vypracavany inšy miechanizm uzajemadziejańnia. Pra heta ministr abarony Biełarusi Viktar Chrenin zajaviŭ u intervju telekanału «Al-Džazira».
«Iskander» — heta vielmi dobry rakietny kompleks. Hetaja praca pa daručeńni kiraŭnika dziaržavy pravodziłasia i pravodzicca ŭ vajennych viedamstvach. My bačym, što Rasijskaja Fiederacyja praktyčna skončyła pieraŭzbrajeńnie na hety rakietny kompleks, i my taksama chočam jaho ŭ siabie mieć. Choć, možna skazać, my jaho ŭžo majem. U nas jość rehijanalnaja hrupoŭka vojskaŭ, u skład jakoj taksama ŭvachodzić hety rakietny kompleks, jaki, kali budzie takaja nieabchodnaść, prybudzie na našu terytoryju i budzie vykonvać zadačy», — zajaviŭ ministr abarony.
Pra rasijskija bazy Chrenin skazaŭ nastupnaje.
«A navošta jany nam tut patrebnyja? Kali ŭ nas jość Sajuznaja dziaržava, jość paniaćcie «rehijanalnaja hrupoŭka vojskaŭ», u jakuju ŭvachodziać usia armija Biełarusi i častka sił i srodkaŭ ad Rasijskaj Fiederacyi, jakich całkam, pa našych raźlikach, dastatkova, — skazaŭ Viktar Chrenin. — Kali budzie nieabchodnaść, Rasija zusim pobač, jany ŭsie buduć u nas na terytoryi. Raźmiaščać dadatkova avijacyjnyja, jašče niejkija bazy… Dy jany nie patrebnyja».
