Polšča paviedamiła biełaruskim pamiežnikam, što 21 listapada spynić hruzavyja pieravozki praz «Kuźnicu»
Dziaržpahrankamitet Biełarusi atrymaŭ aficyjny list ad polskaha boku adnosna jaho namieru prypynić z 21 listapada hruzavoje złučeńnie ŭ čyhunačnym punkcie propusku «Kuźnica».
U suviazi z hetym Dziaržpamiežkamitet nakiravaŭ adkaz z tłumačeńniem situacyi pablizu aŭtadarožnaha punkta propusku «Bruzhi» (z polskaha boku — «Kuźnica Biełastockaja»), a taksama prainfarmavaŭ ab mierach, jakija prymajucca dla ŭrehulavańnia situacyi i adsutnaści pahrozy dla supracoŭnikaŭ polskich słužbaŭ.
Taksama biełaruski bok paviedamiŭ pra hatoŭnaść adnavić pracu na aŭtadarožnym punkcie propusku «Bruzhi».
Ale niekatoryja ekśpierty ličać, što na taki krok Polšča naŭrad ci pojdzie. Na dumku dyrektara Centra Logconsult Dźmitryja Kuračkina, kali heta budzie realizavana, to nastupstvy buduć sumnyja, piša Office life.
«Kali palaki kažuć: my vam čyhunačny tranzit pierakryjem, treba razumieć, čyich tavaraŭ heta tyčycca, a tavary — kitajskija… Tamu nichto ničoha pierakryvać nie budzie. Tut sutykajucca hieapalityčnyja intaresy Kitaja i Rasii. Heta vielmi surjoznyja rečy, jakija vyrašajucca na bolš vysokim uzroŭni. Tamu pierakryvać ci nie pierakryvać — nie Polšča budzie heta vyrašać», — ličyć Kuračkin.
Ekśpiert dadaje, što na čyhunačnym pierachodzie «Kuźnica — Bruzhi» sfakusavany značny hruzapatok, i kali spyniacca mytnyja apieracyi, to heta budzie kałaps, zatory čyhunačnych sastavaŭ na terytoryi Biełarusi. Paśla Małaševič (Polšča) pamiežny pierachod «Kuźnica — Bruzhi» źjaŭlajecca druhim pa značnaści, pa abjomie hruzapatoku.
Heta značyć, što nastupstvy mohuć być sumnyja. Paśla taho, jak pierakryli tranzit aŭtamabilnych pieravozak u Bruzhach, hruzapatoki raźmierkavalisia pamiž dvuma inšmi pierachodami, jany pierahružanyja. Plus palaki tarmoziać afarmleńnie hruzavikoŭ, jakija iduć u Biełaruś z boku Polščy. Vielmi vialikija čerhi na afarmleńnie fur z boku Polščy — pa 20 kiłamietraŭ», — kaža ekśpiert.
Kuračkin pryznaje, što mihracyjny kryzis stvaryŭ napružańnie, jakoje ŭpłyvaje na pamiežny tranzit. Zakryćcio aŭtamabilnaha pierachodu «Bruzhi — Kuźnica» drenna adbiłasia na intaresach rasijskich i biełaruskich aŭtapieravozčykaŭ. I kali jašče pierakryć čyhunačny trafik, heta ŭzmocnić niehatyŭnyja nastupstvy dla pieravozak. «Ale ja dumaju, da hetaha naŭrad ci dojdzie, pakolki tut palaki nie samastojnyja ŭ pryniaćci takoha rašeńnia», - zaklučaje ekśpiert.
Što budzie ź biełaruskaj ekanomikaj, kali Polšča zakryje miažu, a Łukašenka — tranzit hazu?
