Polšča pahražaje spynić čyhunačny ruch i zakryć astatnija pamiežnyja pierachody na miažy ź Biełaruśsiu
Praź mihracyjny kryzis i eskałacyju padziej na miažy Polšča moža zakryć pamiežnyja pierachody i spynić čyhunačny ruch ź Biełaruśsiu, zajaviŭ kiraŭnik MUS Polščy.
Zaraz zakryty tolki punkt propusku «Kuźnica», ź biełaruskaha boku heta «Bruzhi».
9 listapada pobač z pamiežnymi punktami raźmiaściŭsia łahier mihrantaŭ nie mienš jak na 2000 čałaviek. Jany sprabujuć prarvacca praź miažu i patrapić u Hiermaniju. Polšča admaŭlajecca prymać ich.
Miž tym situacyja ŭ mihranckim łahiery ‒ vielmi ciažkaja. Siońnia na polskim baku pobač ź miažoj Biełarusi było znojdziena jašče adno cieła mihranta ‒ 20-hadovaha hramadzianina Siryi. Pryčyna śmierci nieviadomaja.
Nočču hrupa mihrantaŭ kala 100 čałaviek sprabavała nielehalna pierasiačy miažu. Polskija pamiežniki paviedamlajuć, što mihranty ŭžyli suprać ich ślozatačyvy haz.
U samim łahiery ŭmovy ‒ na miažy humanitarnaj katastrofy. Nijakich surjoznych krokaŭ dla vyrašeńnia prablemy namiotavaha łahiera zroblena pakul nie było.
Miž tym, navat biełaruskija prapahandysty nie chavajuć, što vyrašyć prablemu — nieskładana dla biełaruskich uładaŭ, treba tolki «paprasić Łukašenku». Siońnia, darečy, Pucin anansavaŭ mahčymuju razmovu Mierkiel i Łukašenki.
