Pravajdar dasłaŭ ad Minzdaroŭja dziŭnuju SMS z prośbaj vakcynavacca. A potym adchryściŭsia ad jaje
7 listapada našy čytačy stali atrymlivać SMS-paviedamleńnie ad kampanii «Kosmas TB» z prośbaj vakcynavacca «z-za znachodžańnia hramadzian ź Blizkaha Uschodu». U paviedamleńni śćviardžałasia, što internet-pravajdar spasyłajecca na rekamiendacyi Ministerstva achovy zdaroŭja.
«Uličvajučy značny rost infiekcyj COVID-19, vyklikany časovym znachodžańniem hramadzian z krain Blizkaha Uschodu na terytoryi RB, minzdrav.gov.by rekamienduje prymać vakcynu ad COVID-19», — havaryłasia ŭ sms-paviedamleńni.
U «Kosmas TB» zajavili, što adbylisia techničnyja prablemy.
«U vyniku techničnaha zboju raboty servisu sms-rassyłki niekatorym z vas pastupiła sms ź niekarektnym źmiestam. Abstaviny pryčyn adpraŭki sms vyśviatlajucca śpiecyjalistami kampanii. Budźcie zdarovyja i nie zabyvajcie ab mierach prafiłaktyki COVID-19», — udakładnili ŭ kampanii.
U Minzdaroŭja zajavili, što nijakaha dačynieńnia da rassyłki ad «Kosmas TB» nie majuć. «Ministerstva achovy zdaroŭja sapraŭdy rekamienduje vakcynavacca suprać hrypu i COVID-19, ale nijakaha dačynieńnia da tych sms u padpisčykaŭ kampanii «Kosmas TB» Ministerstva achovy zdaroŭja nie maje», — rastłumačyli ŭ viedamstvie.
