Šrajbman: Finalizacyja darožnych kart simvalična važnaja
Palityčny analityk Arciom Šrajbman analizuje ŭ svaim telehram-kanale vyniki ŭčorašniaj videasustrečy Łukašenki i Pucina i padpisańnie darožnych kart.
«Ałarmisty zaŭsiody znojduć padstavu dla paniki, tamu niama sensu ŭ sto treci raz pahłyblacca ŭ toje, što padpisanyja dakumienty a) dalokija ad viersii 2019 hoda z palityčnaj intehracyjaj, b) zaciahnutyja pa terminach i de-jure nie pryviazanyja da kankretnych puhaŭ i piernikaŭ, v) razmytyja ŭ farmuloŭkach (harmanizacyja, ahulnyja padychody, zbližeńnie), heta značyć ich možna tłumačyć pa-roznamu i hadami badacca za hetyja traktoŭki.
U rešcie rešt, u nas bolš za 20 hadoŭ padpisany i ŭstupiŭ u siłu dahavor ab adzinaj valucie, parłamiencie, Kanstytucyi i navat simvolicy, a my nie možam navat roŭminh kančatkova admianić.
Toje ž datyčycca padpisanaj Sajuznaj vajennaj daktryny i kancepcyi mihracyjnaj palityki. Heta dekłaracyi, jakija, u adroźnieńnie ad raźmieščanych pad Hrodnam vučebna-bajavoha centra i S-400, nie majuć pramych nastupstvaŭ i prymajucca chutčej dla pompy.
Nie prahučali nijakija detali novaj rasijskaj padtrymki. Jana ŭ nievialikim pamiery (0,6 młrd kredytaŭ na paŭtara hoda) była abiacanaja dva miesiacy tamu, i, mabyć, uviazanaja z vykanańniem sajuznych prahram.
Kab padkreślić, što Minsk i tak bahata kormiać, Pucin znoŭ pryvioŭ svaje ŭžo firmovyja raźliki enierhasubsidyj, jakija Rasija daje Biełarusi. Drennaje toje viasielle, jakoje nie pačynajecca z vyśviatleńniaŭ, chto bolš skinuŭsia.
Ale finalizacyja darožnych kart simvalična važnaja. Baki svaimi rukami panizili płanku ambicyj sajuznaha budaŭnictva, vyvieŭšy temy nakštałt adzinaj valuty ŭ nieahladnuju budučyniu.
Toje, što Łukašenka jašče na krok nabliziŭsia da pryznańnia Kryma rasijskim (pavinšavaŭšy krymčan z Dniom rasijskaha narodnaha adzinstva) i paprasiŭ tudy jaho zvazić, aznačaje, što Minsk znoŭ vyrašyŭ zamiest dziejańniaŭ nalahać na rytoryku, Masaž kramloŭskich erahiennych zon.
Zvyčajna Łukašenka robić tak, kali nie hatovy prapanavać realnych sastupak. Cikava, što budzie, kali Pucin surjozna zaprosić i, naprykład, publična. Davać zadniuju? Sałaŭjovy-Kisialovy źniščać u toj ža viečar u svaich šou. Jechać-ryzyknuć miljardnymi prodažami paliva va Ukrainu.
«Epachalnaść» momantu z punktu hledžańnia Rasii padkreślivajecca tym faktam, što faktyčna Pucin adyšoŭ sa śviata ŭ Krymie na zum-koł ź Minskam.
Choć, kali b dakumienty sapraŭdy mieli na ŭvazie praryŭnuju intehracyju, Kramlu składana było b prydumać bolš mocny simvaličny žest, čym vočna i ŭračysta padpisać ich u Rasijski Dzień narodnaha adzinstva — choć u Sievastopali, choć u Breście, choć u tajzie.
P. S. Cikavy siužet — z pryznańniem Kryma «de-fakta i de-jure rasijskim», jakoje zrabiŭ deputat Savinych ad imia ŭsioj Biełarusi. Deputat i eks-ambasadar, zdajecca, daŭno choča ŭznačalić MZS, robiačy zamiežnapalityčnyja zajavy nasupierak linii Makieja. Jon užo daŭno prapanoŭvaŭ admovicca ad šmatviektarnaści, darečy.
Mabyć, raźlik na toje, što prarasijski viecier rana ci pozna źniasie Makieja, i ŭ novaj, bolš danieckaj Biełarusi, patrebny budzie mienavita taki jak ministr Andrej Uładzimiravič.
Pralik deputata nie ŭ tym, što jon składaje ŭsie jajki ŭ adzin košyk, a ŭ tym, što ŭ čarhovy raz dazvalaje sabie palityčnyja ambicyi ŭsłych. Heta nie taja jakaść, jakuju Łukašenka šanuje ŭ ludziach. Ale, moža być, adrasat sihnałaŭ Savinych nie ŭ Minsku, a ŭ Kramli, typu «zaŭvažcie mianie na budučyniu». Kali tak, to heta jašče śmialej. Tak skazać, usio na ziero.
«Rasija dabivajecca ŭsiaho, čaho chacieła». Ekśpierty, čynoŭnik i siłavik kamientujuć padpisańnie intehracyjnych prahram
Łukašenka padpisaŭ dekret, jaki zaćviardžaje sajuznyja prahramy z Rasijaj. Ale ničoha nie jasna
