U Krasnadarskim krai niezadavolenyja cenami na pachavalnyja pasłuhi pryvieźli da budynka administracyi cieła pamierłaj
Da administracyi Cimašeŭskaha rajona ŭ Krasnadarskim krai (Rasija) na nasiłkach prynieśli cieła pamierłaj. Jak zajaviŭ jaje syn, troje sutak trup admaŭlajucca prymać u miascovym morhu i patrabujuć hrošy. Na situacyju adreahavaŭ kiraŭnik rajona Andrej Palij, a prakuratura pačała pravierku, paviedamlaje currenttime.tv.
Videa z trupam pierad administracyjaj apublikavaŭ kanał «Cimašeŭsk biez cenzury». Na im mužčyna stanovicca na kaleni pierad nasiłkami i emacyjna raspaviadaje: «Trecija sutki viadu baraćbu ŭ adzinočku, trecija sutki nie mahu maci zdać. Dapamažycie Uładzimir Uładzimiravič [Pucin], dapamažycie «Adzinaja Rasija», spynicie».
Sa słoŭ prysutnych, jany pryvieźli trup z susiedniaha Kalininskaha rajona, majuć usie dakumienty, ale ŭ morhu admaŭlajucca prymać cieła. Tam nibyta prymajuć tolki cieły, dastaŭlenyja miascovym biuro miedyka-sacyjalnaj ekśpiertyzy, košt transparciroŭki składaje 7000 rasijskich rubloŭ (240 biełaruskich).
Taksama jany zajavili, što afilavanyja rytualnyja firmy ažyćciaŭlajuć svaje pasłuhi zavyšanymi koštami, ale mienavita ich nastojliva rekamiendujuć rodnym pamierłych. Da ludziej vyjšaŭ načalnik adździeła pa ŭzajemadziejańni z pravaachoŭnymi orhanami Cimašeŭskaha rajona Anton Marčanka, jaki spačatku zajaviŭ, što dziejańni daviedzienych da adčaju ludziej — heta parušeńnie hramadskaha paradku, a zatym, što «hramadski rezanans nam niepažadany».
Kiraŭnik Cimašeŭskaha rajona Andrej Palij u sacyjalnaj sietcy zajaviŭ, što situacyja źjaŭlajecca amaralnaj i niedapuščalnaj, va ŭładzie jość pytańni da pracy morha i rytualnych kampanij, ź jakimi treba «navodzić paradak». Pravierku pačała pravodzić i prakuratura.
