Jakija nastupstvy budzie mieć apytańnie, jakoje pakazała, što rejtynh Łukašenki mienšy, čym u Cichanoŭskaj, Babaryki i Kaleśnikavaj?
Dniami prajekt «Daśje Čarnova» źliŭ u sieciva danyja apytańnia, praviedzienaha Usierasijskim centram vyvučeńnia hramadskaj dumki (UCVHD) dla Ministerstva zamiežnych spraŭ Rasii. Vyniki jaho pikantnyja: zhodna z apytankaj, naprykład, biełarusy lepš za ŭsio staviacca da Maryi Kaleśnikavaj, Viktara Babaryki i Śviatłany Cichanoŭskaj, a voś u Łukašenki tam vialiki antyrejtynh: 55% respandentaŭ staviacca da jaho piersony admoŭna (a 59% apytanych uvohule padtrymlivajuć jaho adchileńnie ad ułady).
Dalej — jašče cikaviej. 65% biełarusaŭ marać, kab siońniašnija ŭłady pačali pieramovy z apazicyjaj.
Bolšaja častka apytanych taksama vystupaje za pierachod da parłamienckaj respubliki i pry hetym — suprać abjadnańnia Biełarusi i Rasii ŭ adzinuju dziaržavu.
76% suajčyńnikaŭ chaciełasia b bačyć rašučyja reformy ŭ halinie ekanomiki, a 66% — źjaŭleńnie novych palityčnych partyj.
Respandenty vykazali adnaznačnaje «nie» błakiroŭcy niezaležnych miedyja i aryštam žurnalistaŭ, a taksama asudžeńniu Viktara Babaryki na 14 hod kałonii.
Lepš za ŭsio, zhodna z apytańniem simpatyj da dziaržaŭ i arhanizacyj, biełarusy staviacca da Ukrainy. Rasija ŭ rejtynhu pryjaznaści padzialaje druhoje miesca z Polščaj. Amal adrazu paśla ich iduć ES, Litva i tolki potym Kitaj.
Što tyčycca zamiežnych palitykaŭ, to najbolšaja simpatyja ŭ apytanych — da Anhieły Mierkiel, a horšy rejtynh — u prezidenta ZŠA Džo Bajdena.
Pieršapačatkova da danych źlivaŭ niekatoryja pastavilisia jak da fejkavych, ale VCIOM nie abvierhnuŭ ich najaŭnaść. Heta aficyjna kaža, što, chutčej za ŭsio, apytańnie sapraŭdy mieła miesca. Choć centr i nie maje licenzii na praviadzieńnie palityčnych apytańniaŭ u Biełarusi.
Ilustracyjnaje fota.
U kamientary «Novaj haziecie» dyrektar VCIOM Valeryj Fiodaraŭ adznačyŭ, što pravodzić apytańni ŭ Biełarusi biez akredytacyi niebiaśpiečna, ale na pytańnie ŚMI pra realnaść źlitych danych napramuju tak i nie adkazaŭ.
Na pramuju prośbu «Našaj Nivy» prakamientavać hety źliŭ u centry adreahavali koratka: «My nie dajom kamientaroŭ pa dadzienym pytańni».
«Apytańnie abraźlivaje dla Łukašenki. Jon uspryniaŭ jaho jak ataku z boku Kramla»
Palityčnyja analityki sychodziacca ŭ tym, što padstaŭ nie daviarać realnaści praviedzienaha apytańnia niama.
«Nie sumniavajusia, što VCIOM pravodziŭ heta apytańnie. Bo i brytanski Chatham House pravioŭ apytańnie, i amierykanski IRI. Usie apytańni — heta zaŭsiody zakrytaja infarmacyja, jany nie publikujucca ŭ adkrytym dostupie. Ale ŭsie jany źjaŭlajucca na stale ŭ Łukašenki. I mnie padajecca, uciečku dakłada VCIOM (niavažna, chto heta zrabiŭ nasamreč), Łukašenka i jaho aparat prypisvajuć namieram Kramla», — ličyć palitołah, ekśpiert iSANS Alaksandr Marozaŭ.
Mienavita z hetym źlivam palitołah źviazvaje napadzieńnie na Pucina z ekranaŭ biełaruskaha telebačańnia.
«Na moj pahlad, słovy Jaŭhiena Pustavoha źviazanyja nie z palemikaj vakoł zatrymańnia žurnalista «Kamsamolskaj praŭdy» Hienadzia Mažejki, a z publikacyjaj źlivu. Heta apytańnie abraźlivaje dla Łukašenki. Jon uspryniaŭ jaho jak ataku z boku Kramla, jak kankretny pasył.
A pasył u tym, što Łukašenka karystajecca mienšaj padtrymkaj, čym Kaleśnikava, Babaryka, Cichanoŭskaja (i navat čym zamiežnyja lidary). U adkaz na heta prapahanda i zapuściła sustrečnuju strału, na moj pohlad. Choć potym Pustavy i jaho kalehi zrabili «niavinnyja tvary»: maŭlaŭ, heta nie pra Kreml my, a pra Bajdena», — kamientuje Marozaŭ.
Pry hetym ekśpiert adznačaje: nie pieršy raz Minsk i Kreml abmieńvajucca takimi «kalučaściami» napiaredadni čarhovych pieramoŭ Pucina i Łukašenki. I abodva baki pryzvyčailisia, što «infarmacyjnyja najezdy» — častka palityčnaha handlu.
Ilustracyjnaje fota.
«Apytańnie asłablaje pazicyi biełaruskaha režymu, ahalaje ŭraźlivyja miescy»
Palitołah, dyrektar BISS Piotr Rudkoŭski źviartaje ŭvahu: vielmi važna, što danyja sychodziać ad rasijskaha centra. Na daśledavańni zachodnich instytucyj kštałtu Chatham House ci apytańni ŭ Telegram prapahanda mahła reahavać admaŭleńniem kštałtu: «Za apytańniami stajać varožyja zachodnija centry, jakija viaduć infarmacyjnuju vajnu ź Biełaruśsiu i jaje zakonnymi ŭładami». Što tyčycca mierańniaŭ rejtynhaŭ unutry krainy, to tut hadami vydavalisia patrebnyja režymu ličby: i CVK ź Jarmošynaj, i EcooM.
«VCIOM — heta zusim inšaja historyja. Heta nie zachodni centr, a rasijski. I navat nie pryvatny, a dziaržaŭny. Bolš za toje, jon karystajecca niemałym aŭtarytetam jak unutry Rasii, tak i na mižnarodnaj arenie. I mienavita pad brendam hetaha centra, chaj sabie ŭ jakaści «ŭciečki ŭ ŚMI», fihurujuć złaviesnyja ličby: Łukašenku nie padtrymlivaje 55%», — kamientuje Rudkoŭski.
Palitołah adznačaje, što dla adnosinaŭ biełaruskich uładaŭ i Kramla hety kazus z uciečkaj — kropla ŭ mory. Ale i ŭ jaje jość sens:
«Jana asłablaje pazicyi biełaruskaha režymu, ahalaje ŭraźlivyja miescy. Kali ŭjavić, što heta byŭ sankcyjanavany źvierchu źliŭ, to, vidać, heta byŭ napamin pra niepaźbiežnaść tranzitu paśla kanstytucyjnaj reformy. Z takim vysokim niehatyŭnym rejtynham niama sensu maryć pra zachavańnie viarchoŭnaj palityčnaj ułady».
