Vakcynacyja ci pieražytaja infiekcyja? Vučonyja raspaviali, što lepiej abaraniaje ad kavidu
Jak vyśviatlajecca, šmat što zaležyć ad štama.
Fota depositphotos.com
Nacyjanalnaja statystyčnaja słužba Brytanii pakazała vyniki daśledavańnia, jakoje pralivaje śviatło na duža aktualnaje ŭ čas vakcynacyi pytańnie. Navukoŭcy raspaviali, nakolki naturalny imunitet, zdabyty paśla pieražytaha kavidu, adroźnivajecca ad abarony, atrymanaj paśla pryščepki.
Kab zrazumieć, jaki typ imunitetu macniejšy, ekśpierty praanalizavali šerah vypadkaŭ kavidu. Ich cikaviła, ci byli respandenty, čyja historyja chvaroby trapiła pad uvahu daśledčykaŭ, raniej vakcynavanyja i ci pieražyvali jany kavid raniej. Taksama ekśpierty ŭličvali i inšyja faktary ryzyki, naprykład uzrost čałavieka, piša Guardian.
Analitykaŭ cikavili dva pieryjady. Pierš za ŭsio, jany vyvučyli vypadki chvaroby sa śniežnia 2020 hoda pa siaredzinu maja 2021-ha, kali daminavaŭ samy pieršy štam kavidu — «alfa».
U toj čas całkam projdzienaja vakcynacyja źnižała ryzyku zachvareć u siarednim na 79%, pryčym hetaja ličba mała zaležała ad typu vakcyny. Adnak imunitet ad pieražytaj chvaroby abaraniaŭ ad novaha kavidu tolki prykładna na 65%.
Taksama navukoŭcaŭ zacikaviŭ čas ź siaredziny maja pa siaredzinu žniŭnia 2021 hoda, kali ŭ Brytanii asnoŭnym štamam stała «delta».
U hetym vypadku całkam projdzienaja vakcynacyja źnižała ryzyku atrymać stanoŭčy test na 64-70%. Imunitet paśla kavidu davaŭ padobny vynik — 65-77%.
I ŭ pieršy, i ŭ druhi pieryjad vakcynacyja dźviuma dozami pryščepki davała lepšy vynik, čym tolki adna doza.
Ekśpierty padkreślivajuć, što zroblenaje daśledavańnie nie źjaŭlajecca idealnym. Naprykład, praca była b bolš jakasnaj, kali b jaje ŭdzielniki byli padabranyja advolna.
Taksama roznyja katehoryi ludziej mohuć pa-roznamu stavicca da zdačy testaŭ na kavid, tamu ŭ niekatorych inšych pracach vykarystoŭvajucca danyja ludziej, što rehularna zdajuć testy — naprykład, miedykaŭ.
Tym nie mienš ciapierašniaje daśledavańnie brytancaŭ — prykład jakasna zroblenaha analizu.
Zrabili vakcynu i pieražyli kavid? Vinšujem: u vas hibrydny imunitet i vam nie patrebnyja bustarnyja vakcyny
