Turcyja abviaściła pasłoŭ dziesiaci krain piersonami non hrata
Erdahan daručyŭ MZS vysłać z Turcyi i abviaścić piersonami non hrata pasłoŭ 10 krain: ZŠA, Kanady, Francyi, Finlandyi, Danii, Hiermanii, Niderłandaŭ, Novaj Ziełandyi, Narviehii i Šviecyi.
«Ja daŭ ukazańnie našamu ministru zamiežnych spraŭ nieadkładna pryniać miery da taho, kab hetyja 10 pasłoŭ byli abvieščanyja piersonami non hrata», — skazaŭ Erdahan, vystupajučy ŭ horadzie Eskišechir. Tranślacyja viałasia ŭ Twitter tureckaha lidara.
Pryčynaj takoha rašeńnia staŭ zaklik vyzvalić pravaabaroncu Asmanu Kavału, ź jakim dypłamaty vystupili na hetym tydni. Paśla hetaha ich vyklikali ŭ MZS Turcyi, dzie nahadali ab nieabchodnaści vykonvać Vienskuju kanviencyju ab dypłamatyčnych znosinach.
Asman Kavała — pravaabaronca i zasnavalnik kulturnaha fondu Anadolu Kültür AŞ, jaki, u pryvatnaści, padtrymlivaje prajekty etničnych i relihijnych mienšaściaŭ, jakija časta majuć mižnarodnuju nakiravanaść — naprykład, prymireńnie pamiž tureckim i armianskim nasielnictvam i mirnaje rašeńnie kurdskaha pytańnia.
U lutym 2020 hoda turecki sud apraŭdaŭ jaho pa abvinavačvańni ŭ datyčnaści da sproby źviaržeńnia ŭrada pa spravie ab pratestach u stambulskim parku Hiezi ŭ 2013 hodzie. Adnak stambulskaja prakuratara ŭ toj ža dzień vydała novy ordar na jahony aryšt — hetym razam jaho padazravali va ŭdziele ŭ sprobie dziaržaŭnaha pieravarotu ŭ Turcyi ŭ lipieni 2016 hoda.
