U Ispanii prajšoŭ pieršy čempijanat śvietu pa hulni z pavietranym šarykam: treba jak maha daŭžej utrymać jaho ŭ pavietry
14 kastryčnika ŭ ispanskim horadzie Tarahona adbyŭsia pieršy čempijanat śvietu pa hulni z pavietranym šarykam — Balloon World Cup. Pra heta piša «Bi-bi-si». Pieršym pieramožcam spabornictvaŭ staŭ pieruaniec.
Finalny matč pamiž Pieru i Hiermanijaj:
Turnir prachodziŭ na korcie pamieram 8 na 8 mietraŭ, a ŭ jaho centry pastavili aŭtamabil, kanapy i inšyja pradmiety, jakija pieraškadžali hulcam. Adzinaje praviła hulni — utrymać šaryk u pavietry jak maha daŭžej i nie pieraškadžać svajmu supierniku. Hulec atrymlivaje punkt, kali inšy spartsmien nie paśpiavaje adbić šaryk i jon kranajecca padłohi.
U finale pieruaniec Frančeska de ła Krus pieramoh niemca Jana Śpisa ź likam 6:2.
Sam čempijanat śvietu pa hulni ŭ pavietrany šaryk natchniony nie tolki dziciačaj hulnioj, ale i virusnymi videa ź ciktoku bratoŭ Antonia i Dyjeha Aredonda z Arehona. Padčas karancinu ich roliki stali virusnymi ŭ sacsietkach.
Čempijanat śvietu arhanizavaŭ abaronca «Barsiełony» Žerar Pikie i kibierspartyŭny kamientatar i błohier Ibaj Ljanas. Ciktokieraŭ zaŭvažyŭ Ljanas i prapanavaŭ Pikie arhanizavać i prainviestavać turnir. U Balloon World Cup sustrelisia pradstaŭniki z 32 krain — u tym liku i braty Aredonda, jany vystupali za ZŠA.
