U Praviłach prafiesijnaj etyki advakata prapisali, jak treba kamunikavać sa ŚMI. Raniej takoj normy nie było
U Biełarusi detalova ŭrehulavali pytańni ŭzajemadziejańnia advakataŭ sa srodkami masavaj infarmacyi. Pastanova Ministerstva justycyi №180 ad 30 vieraśnia 2021 hoda, jakoj zaćvierdžanyja novyja praviły prafiesijnaj etyki advakata, aficyjna apublikavana na Nacyjanalnym pravavym internet-partale. U papiaredniaj redakcyi praviłaŭ punkta, jaki b asobna rehulavaŭ kamunikacyju advakata sa ŚMI, nie było.
Zhodna z praviłami, advakaty majuć prava pradstaŭlać srodkam masavaj infarmacyi, raspaŭsiudžvać (u tym liku z dapamohaj kamientaroŭ, acenak) u hłabalnaj kampjutarnaj sietcy Internet dakładnuju i praŭdzivuju infarmacyju. Infarmacyja pavinna pradstaŭlacca z pazicyi prava.
«Lubyja zajavy advakata, u tym liku pry abmierkavańni i tłumačeńni pravavych normaŭ, pavinny być adkaznymi, dakładnymi i nie ŭvodzić u zman. Danosiačy infarmacyju pa kankretnych spravach ab sudovych sprečkach arhanizacyj i hramadzian, śledčych i inšych pracesualnych dziejańniach, advakat nie pavinien dapuskać nieabhruntavanych, nie padmacavanych dakładnymi faktami i materyjałami spravy mierkavańniaŭ i vysnoŭ», — havorycca ŭ dakumiencie.
Akramia taho, adznačajecca, što advakat, razmaŭlajučy z pradstaŭnikami srodkaŭ masavaj infarmacyi, internet-resursaŭ, pavinien prymać miery dla taho, kab jaho słovy nie byli padniesienyja masavaj aŭdytoryi ŭ skažonym vyhladzie.
Taksama prapisanaja adkaznaść za parušeńnie praviłaŭ prafiesijnaj etyki advakata.
Pastanova ŭstupaje ŭ siłu z 30 listapada 2021 hoda.
