«Braŭ udzieł u Maršy Svabody, słuchaŭ Lapisa Trubiackoha»: sudziać vałanciora štaba Cichanoŭskaj
Sud Savieckaha rajona Minska pačaŭ razhlad kryminalnaj spravy palitviaźnia Alaksandra Dabryjanika pa č.1 art. 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich).
Alaksandr Dabryjanik — uradženiec Słonima, aktyvist i vałancior u vybarčym štabie Śviatłany Cichanoŭskaj. Byŭ zatrymany 24 maja. Da suda ŭtrymlivaŭsia ŭ SIZA №1 Minska, paviedamlajuć pravaabaroncy.
Pavodle materyjałaŭ śledstva, 16 žniŭnia 2020 hoda ŭ Minsku, «z metaj publičnaha vykazvańnia svaich hramadskich pohladaŭ, pryniaŭ aktyŭny ŭdzieł u hrupavych dziejańniach, jakija hruba parušyli hramadski paradak».
A mienavita: z 14:00 da 21:00 hadziny, znachodziačysia na praśpiekcie Niezaležnaści, vulicach Śviardłova i Maskoŭskaj, dalej na praśpiekcie Pieramožcaŭ, razam ź inšymi parušaŭ hramadski paradak, vykrykvaŭ łozunhi, plaskaŭ u ładki, vychodziŭ na prajeznuju častku i pierakryvaŭ ruch hramadskaha transpartu. Pry hetym, nie padparadkoŭvaŭsia zakonnym patrabavańniam pradstaŭnikoŭ ułady — supracoŭnikaŭ milicyi.
Svaju vinu ŭ chodzie sudovaha śledstva abvinavačany pryznaŭ častkova. Skazaŭ, što nie vykarystoŭvaŭ simvoliku i aktyŭna nie ŭdzielničaŭ, a taksama nie pieraškadžaŭ ruchu hramadskaha transpartu.
Abvinavačvańnie nazvała kala dvuch dziasiatkaŭ tralejbusnych i aŭtobusnych maršrutaŭ, pracy jakich nibyta pieraškadžaŭ Dabryjanik.
U sudzie była dapytanaja śviedka Volha Ahiejeva, dobraja znajomaja Dabryjanika. Žančyna na pytańni abvinavačvańnia adkazała, što nie pamiataje ciapier, ci Andrej paviedamlaŭ joj, što chadziŭ na niesankcyjanavanyja masavyja mierapryjemstvy, ci nie. Pra 16 žniŭnia čuła, što ŭ toj dzień masavyja mierapryjemstvy byli.
Słuchaŭ Lapisa Trubiackoha «Hraj», raspaŭsiudžvaŭ «Narodnuju Volu»
Pry vyvučeńni piśmovych materyjałaŭ spravy było adznačana, što pry daśledavańni źmieściva telefona abvinavačanaha i jahonaha kampjutara, vyjaŭleny fajły, jakija majuć dačynieńnie da spravy. Tak, była znojdziena papka z fotazdymkami ŭlotak palityčnaha źmiestu, haziety «Narodnaja Vola» i vyjavaj supracoŭnika milicyi. Ale ŭsie fota byli zroblenyja paśla 16 žniŭnia.
Taksama znojdzienaje «daručeńnie» Dabryjaniku ad redakcyi «Narodnaj Voli» ab biaspłatnym raspaŭsiudzie ekzemplaraŭ haziety, padpisanaje hałoŭnym redaktaram Siaredzičam.
Znojdziena niekalki videarolikaŭ pra padziei, jakija adbyvalisia viečaram 16 žniŭnia i ŭ inšyja dni, ahučanyja kamientary Dabryjanika ŭ roznych sietkach. Nazvany taksama videarolik Lapisa Trubiackoha «Hraj», znojdzieny ŭ Alaksandra.
Fihurujuć u spravie i źviestki ź internet-krynicy PC «Viasna» pra śpiski zatrymanych 16 žniŭnia 2020 hoda.
U spravie majecca paviedamleńnie ab tym što Alaksandr 15 vieraśnia 2020 hoda byŭ pryciahnuty da administracyjnaj adkaznaści pa artykule 23.34 KaAP.
Pradpryjemstva «Minsktrans» chadajničała ab dałučeńni da spravy materyjalnaha pazovu z-za pieraškody ŭ pracy hramadskaha transpartu.
