U Biarezinskim zapaviedniku dva aleni sčapilisia rahami ŭ bitvie za samku i patanuli
Vierasień i pačatak kastryčnika — čas turnirnych bajoŭ u pieryjad sparvańnia ŭ adnaho z najpryhažejšych pradstaŭnikoŭ našaj fauny — vysakarodnaha alenia. U viečarovyja hadziny i na dośvitku cišynia zapaviednych lasoŭ časta parušajecca hučnym, daloka čuvanym rovam samcoŭ alenia, apisvaje Biarezinski zapaviednik.
Hučny sihnał samca maje dvajakaje značeńnie: heta moža być jak pryzyŭ, tak i zastrašvańnie. Pa mahutnaści rovu aleni raspaznajuć siłu supiernika i vyrašajuć, ci ŭstupać im u adzinaborstva. Maładyja samcy, jak praviła, nie ŭstupajuć u pramoje sutyknieńnie ź fizična macniejšymi, paźbiahajučy mahčymych ranieńniaŭ ad rahoŭ bolš mocnaha supiernika. Zvyčajna za prava vałodańnia samkami ŭ boj ustupajuć prykładna roŭnyja pa sile supierniki i tut časam razyhryvajucca samyja sapraŭdnyja dramy až da hibieli žyvioł.
U pieryjad sparvańnia vypadki hibieli samcoŭ u bajavych pajadynkach užo fiksavalisia ŭ Biełaviežskaj puščy: byli apisany dźvie hibieli samcoŭ alenia z-za skryžavańnia rahoŭ. Padobny vypadak upieršyniu zdaryŭsia sioleta ŭ vieraśni i ŭ Biarezinskim zapaviedniku.
Dva prykładna roŭnyja pa sile samcy namiortva sčapilisia rahami ŭ pojmie Biareziny, dzie adbyvajecca bolšaść turnirnych bajoŭ. Praź niekatory čas žyvioły apynulisia ŭ rečyščy raki i patanuli.
Supracoŭniki zapaviednika vyjavili zahinułych žyvioł na terytoryi Krajcaŭskaha laśnictva. Sčapleńnie rahoŭ akazałasia nastolki mocnym, što raźjadnać ich navat ludziam akazałasia nie pad siłu.