Za malavańnie bčb-ściahoŭ minčukam dali pa 4350 rubloŭ štrafu
Adpaviednaje rašeńnie vynies 21 vieraśnia sud Savieckaha rajona Minska pa kryminalnaj spravie ŭ dačynieńni da Alaksandra Fursa i Natalli Šepiel. Ich vinavacili ŭ apahańvańni budynkaŭ i psavańni majomaści (art. 341 KK).
Alaksandra i Natallu zatrymali 29 krasavika, kali «nieabyjakavaja hramadzianka» paviedamiła ŭ milicyju, što nieviadomyja ludzi malujuć bieła-čyrvona-biełyja ściahi na zbudavańniach pa vulicy Bahdanoviča ŭ Minsku, paviedamlaje «Viasna».
Ich zatrymali, adrazu byli składzienyja administracyjnyja pratakoły pa art. 23.4 KaAP (niepadparadkavańnie) nibyta za admovu prajści ŭ słužbovy aŭtamabil. U RAUS u zatrymanych kanfiskavali bałony ź biełaj i čyrvonaj farbaj, a taksama nalepki z «niezarehistravanaj simvolikaj», źniali pryznalnaje videa. Sudździ Alaksandr Voŭk i Siarhiej Šaciła asudzili adpaviedna Šepiel i Fursa na 5 sutak aryštu.
A potym była zaviedziena kryminalnaja sprava za psavańnie majomaści, a doma ŭ ich prajšli vobšuki.
Na sudzie Alaksandr Furs vinu pryznaŭ całkam, śćviardžaŭ, što nanosiŭ malunki tolki jon. Natalla Šepiel vinu nie pryznała, ad dačy pakazańniaŭ admoviłasia.
U sudzie dapytali ŭ jakaści śviedki Jaŭhieniju Nieściarovič. Heta jana telefanavała ŭ milicyju. Prakuror prasiŭ sud pryznać Fursa i Šepiel vinavatymi i pryznačyć im pakarańnie ŭ vyhladzie štrafu ŭ pamiery 150 bazavych vieličyń kožnamu (4350 rubloŭ).
U vyniku sudździa Alaksandr Voŭk taki i zrabiŭ.
