Jak majecca Dźmitryj Sasnoŭski, jakoha abvinavačvajuć u «zamachu» na Azaronka? Spytali ŭ žonki
Videa nibyta napadu na Ryhora Azaronka pakazvali ŭ lipieni hetaha hoda. Adzin z napadnikaŭ, jakoha zatrymali paśla, — Dźmitryj Sasnoŭski. Zhodna ź siužetam, Sasnoŭski ŭ kampanii jašče adnaho čałavieka (jaho čamuści nie zatrymali) vychodzić z mašyny — i toj inšy nibyta napadaje na Azaronka: praciahvaje da jaho ruki. Dalej pa videa bačna, što skručvajuć Sasnoŭskaha.
U źniavoleńni lidčuk Sasnoŭski ŭžo amal 4 miesiacy. Što pra jaho čuvać?
Čytajcie taksama: Chto taki Dźmitryj Sasnoŭski, jakoha abvinavačvajuć u zamachu na Azaronka? Padrabiaznaści
My spytali jaho žonku, Ksieniju Sasnoŭskuju, jakaja haduje 6-hadovaha syna.
«Ja nie mahu kazać vielmi šmat, bo i ja pad padpiskaj, i advakat pad padpiskaj. Infarmacyju čerpaju ŭ asnoŭnym ź listoŭ, saču ŭ ich za jaho nastrojevymi arelami — to vielmi žałasny stan, to, naadvarot, uźniosły. Kaža, što toje, što pakazvali pa televizary, — usio niapraŭda», — havoryć jana.
Žančyna ličyć, što muža padstavili.
«Ja dumaju, jon išoŭ na niejkuju sustreču, jakaja nabyła voś takuju formu. Jaho padstavili, kab adbyłasia takaja situacyja. Sam jon čałaviek nie radykalny, havoryć pavolna, udumliva, heta mocna razychodzicca z pračytanym zavučanym tekstam pa telebačańni.
Viadoma, heta ŭdar dla nas, nie skažu što strata — čałaviek žyvy, ale heta pustata. Jaho nie chapaje, u kožnym dni nie chapaje. Ja viedaju, što jon ni ŭ čym nie vinavaty. Synu 6 hadoŭ, kažu jamu, što baćka źjechaŭ na rabotu», — skazała Ksienija.
Ci adčuvaje jana salidarnaść?
«U maim atačeńni ŭsie imknucca padtrymać, cikaviacca, što tam u jaho novaha, jak jon. Nie było takoha, kab mnie chto ŭ tvar skazaŭ, što moj muž — złačynca. Ni ja tak nie liču, ni jon sam, ni navakolnyja. Ja pracuju majstram pa manikiury — nichto mnie nie skazaŭ, što moj muž — teraryst, klijenty imknucca padtrymać. Usie biarucca za hałavu: «Hamon, padstava!»
