ES budzie štrafavać Polšču na €500 tysiač u dzień
Jeŭrasajuz abaviazaŭ Polšču prypynić pracu šachty «Turaŭ». Suprać rudnika vystupaje susiedniaja Čechija, jakaja zajaŭlaje pra ekałahičnuju škodu ad jaho.
Sud Jeŭrasajuza ŭ Luksiemburhu abaviazaŭ Polšču štodnia vypłačvać štraf €500 tys., pakul jana nie spynić zdabyču vuhalu na šachcie «Turaŭ».
Na dumku suda, hety krok nieabchodny, kab prymusić Polšču prytrymlivacca rašeńnia ES i prypynić pracu šachty. 17 vieraśnia sud ES pastanaviŭ u jakaści časovaj miery nieadkładna spynić zdabyču ŭ šachcie da vyniasieńnia kančatkovaha rašeńnia nakont jaho dalejšaha losu.
Z adpaviednaj prośbaj u sud źviarnułasia Čechija ŭ kancy lutaha.
Kanflikt pamiž Čechijaj i Polščaj z-za «Turava» praciahvajecca ŭžo niekalki hadoŭ. Na dumku Prahi, praca šachty nanosić ekałahičnuju škodu češskamu nasielnictvu. «Turaŭ» raźmieščany ŭ Bahatyni na paŭdniovym zachadzie Polščy, pablizu ad miežaŭ Čechii i Hiermanii.
«My chočam dapamahčy dziasiatkam tysiač čechaŭ na miažy. Hornazdabyŭnaja pramysłovaść niehatyŭna adbivajecca na ich žyćci kožny dzień», — kazaŭ były kiraŭnik MZS Čechii Tomaš Pietržyčak. Jon tłumačyŭ, što šachta «adbiraje ŭ ich vadu», a pył ad jaje zabrudžvaje pavietra.
Turaŭski kompleks ličycca adnym z samych brudnych u Jeŭropie pa kryteryju abjomu vykidaŭ u atmaśfieru dvuchvokisu vuhlarodu. Akramia taho, rudnik spažyvaje vialikuju kolkaść vady, što drenna adbivajecca na ŭzroŭni padziemnych vod z češskaha boku. U vyniku miascovyja reki drabniejuć, a žychary majuć ciažkaści z atrymańniem pitnoj vady, śvidraviny da jakoj davodzicca rabić usio hłybiejšymi.