Na biełaruska-polskaj miažy znajšli čatyry trupy mihrantaŭ
Cieły troch čałaviek vyjavili sa svajho boku polskija pamiežniki, adnu žančynu znajšli za mietr ad miažy ź biełaruskaha boku.
gpk.gov.by
Žančyna była znojdziena biez abutku, śledstva nie vyklučaje viersiju śmierci ad pieraachaładžeńnia.
Jak paviedamiŭ Dziaržpahrankamitet, cieła žančyny znajšli kala vioski Lasnaja, što ŭ Hrodzienskaj vobłaści, za mietr ad miažy.
Pobač z pamierłaj žančynaj byli troje dziaciej ad 7 da 15 hadoŭ, a taksama mužčyna i pažyłaja žančyna.
Biełaruski bok śćviardžaje, što polskija siłaviki nie dazvolili im pierajści miažu i vypichnuli nazad u Biełaruś.
Tym časam Polskaja pamiežnaja słužba paviedamiła, što na miažy ź Biełaruśsiu znojdzienyja cieły troch čałaviek. Prakuratura Polščy zajmajecca rasśledavańniem ich śmierci.
Nahadajem, što Polšča, Litva, Łatvija, Niamieččyna i jeŭrapiejskija struktury vinavaciać łukašenkaŭcaŭ u sprobie štučna stvarać mihracyjny kryzis na miažy ź ES u palityčnych metach.
Krainy ES, što miažujuć ź Biełaruśsiu, pačali fiksavać rezkaje pavieličeńnie kolkaści vypadkaŭ niezakonnych pierasiačeńniaŭ miažy pačynajučy z červienia hetaha hoda, paśla taho jak krainy Jeŭrasajuza ŭviali sankcyi suprać Biełarusi paśla ŭzmacnieńnia represij u krainie i prymusovaj pasadki samalota «Rajanejra». Spačatku mihranty paśpiachova pratočvalisia ŭ ES, ale pačynajučy sa žniŭnia Litva, Łatvija i Polšča z dapamohaj «Fronteksa» naładzili efiektyŭnaje adsočvańnie hrup mihrantaŭ i błakujuć ich dostup na svaje terytoryi. Kali raniej u Jeŭrasajuz štodzień tut pranikała niekalki socień čałaviek, ciapier hetaja ličba źniziłasia da adzinak. Astatnim nie ŭdajecca pakinuć terytoryju Biełarusi.
Siońnia polskija pamiežniki spynili na miažy 324 čałavieki — heta rekordnaja ličba.
Krainy ES taksama dabilisia ad Iraka spynieńnia avijarejsaŭ u Biełaruś, jakimi prybyvali nielehalnyja mihranty.
U toj ža čas jeŭrapiejcy sabrali dokazy, jak jany śćviardžajuć, spryjańnia biełaruskich struktur dastaŭcy ludziej bieź jeŭrapiejskich viz na miežy krain ES.
Jak paviedamlali dypłamatyčnyja krynicy, Jeŭrasajuz maje namier adkazać na heta novym pakietam sankcyj suprać aficyjnaha Minska.
Biełaruś — adna z redkich krain śvietu, jakaja maje vyklučna napružanyja adnosiny adrazu z čatyrma ź piaćciu svaich susiedziaŭ.
Jeŭrasajuz ličyć situacyju ź mihrantami «hibrydnaj atakaj» na siabie i cyničnym zavablivańniem niavinnych ludziej dla vykarystańnia ich u jakaści žyvoha tavaru.
«Na ŭschodniaj miažy ES ułasna pieražyvajem hibrydnuju ataku ŭ formie ŭciekačoŭ na biełaruskaj miažy. Heta datyčyć Polščy, Litvy i Łatvii», — zajaviła kanclerka Hiermanii Anhieła Mierkiel na pres-kanfierencyi pa vynikach svajho vizitu ŭ Varšavu 11 vieraśnia.
Na jaje dumku, heta aznačaje nieabchodnaść takich formaŭ achovy hetaj častki vonkavaj miažy ES, jakija raniej vykarystoŭvalisia ŭ Hrecyi, z dapamohaj ahulnajeŭrapiejskaha ahienctva Frontex.
«Heta supolnaja meta ŭsich krain ES», — padkreśliła jana. Adsiul zaklik da biełaruskaha boku, kab jon apamiataŭsia; kab biezabaronnych ludziej ź inšych rehijonaŭ [płaniety] nie vykarystoŭvali ŭ jakaści instrumientaŭ hibrydnych atak», — cytujuć kanclerku Mierkiel mižnarodnyja infarmacyjnyja ahienctvy.
Aficyjny Minsk śćviardžaje, što mihranty majuć prava na atrymańnie prytułku dzie chočuć i zajaŭlaje, što prosta pierastali spyniać mihrantaŭ na podstupach da miežaŭ krain ES paśla taho, jak Jeŭrasajuz u ramkach sankcyj suprać łukašenkaŭcaŭ pierastaŭ finansavać pahraničnyja prajekty ŭ Biełarusi.
Naziralniki taksama źviartajuć uvahu, što mihranty nie chočuć zastavacca ŭ kvitniejučaj i haścinnaj Biełarusi i starajucca trapić u krainy Jeŭrasajuza, jakija, jak śćviardžaje biełaruskaja prapahanda, achoplenyja kryzisam.
