Siarhiej Zakońnikaŭ adznačaje 75-hodździe. Akurat u hety dzień vyjšła jaho novaja kniha
16 vieraśnia adznačyŭ dzień narodzinaŭ Siarhiej Ivanavič Zakońnikaŭ — paet, pierakładčyk i jarki publicyst. Siabry pryvieźli jamu padarunak — jaho novuju knihu paemaŭ «Viečny parol».
«Jubilejnyja 75 hadoŭ Siarhieju Zakońnikavu. Paetu, jakoha jašče adzin paet, starejšy jahony siabar Uładzimir Karatkievič, uznaharodziŭ svaim, atrymanym ad partyi i ŭrada, ordenam. A ŭznaharoda ad Karatkieviča kudy vyšejšaja, čym uznaharoda ad partyi i ŭrada — tym bolš ad takoha, jak siońnia. Jaki pra paeta, što žyćcio svajo pryśviaciŭ Biełarusi, ani słovam nie ŭspomniŭ…» — napisaŭ Uładzimir Niaklajeŭ u Facebook.
Siarhiej Zakońnikaŭ naradziŭsia 16 vieraśnia 1946 h. u vioscy Słabada Biešankovickaha rajona Viciebskaj vobłaści ŭ siamji nastaŭnikaŭ. Skončyŭ fiłałahičny fakultet Biełaruskaha dziaržaŭnaha ŭniviersiteta (1969). Vykładaŭ biełaruskuju movu i litaraturu ŭ Kletnaŭskaj siaredniaj škole Barysaŭskaha rajona (1969-1970).
Paśla — litsupracoŭnik ušackaj rajonnaj haziety «Patryjot» (1970-1971), sakratar Ušackaha rajkama kamsamoła (1972-1975).
Z sakavika 1975 h. — karespandent, zahadčyk adździeła haziety «Čyrvonaja źmiena», z kastryčnika 1975 h. — karespandent haziety «Źviazda». Z 1978 h. — instruktar, z 1979 h. — zahadčyk siektara mastackaj litaratury adździeła kultury CK KPB, z 1986 h. — hałoŭny redaktar časopisa «Połymia». Siabra Biełaruskaha PEN-centra z 1989 h. Uznaharodžany ordenam «Znak Pašany» i miedalom. Siabra Sajuza piśmieńnikaŭ z 1977 h.
Pracuje ahladalnikam haziety «Svabodnyja naviny».
Pieršy vierš apublikavaŭ u 1963 h. (hazieta «Viciebski rabočy»). U 1970 h. u kalektyŭnym zborniku «Ruń» nadrukavana padborka vieršaŭ. Pierakłaŭ na biełaruskuju movu paasobnyja tvory rasijskich, ukrainskich, hruzinskich i letuviskich paetaŭ. Łaŭreat Litaraturnaj premii SP Biełarusi imia. A. Kulašova (1982) za knihu vieršaŭ «Pakul žyvie maja biaroza».
Aŭtar knih «Biasieda» (1973), «Ustań da sonca» (1976), «Pakul žyvie maja biaroza» (1981), «Viera, Nadzieja, Luboŭ» (1983), «Prysak času» (1986), «Sutnaść» (1987), «Viečnaja daleč» (1987) i inš.
