Jachty, druhaja siamja, padarunki ad aliharcha Dzierypaski. Vyjšła rasśledavańnie pra ministra zamiežnych spraŭ Rasii Siarhieja Łaŭrova
Spačatku žurnalisty «Važnych istorij», a potym i rasśledvalniki FBK Navalnaha pryśviacili svaje materyjały ministru zamiežnych spraŭ Siarhieju Łaŭrovu. U Łaŭrova reputacyja siarod rasijan jak prystojnaha palityka. Tamu jaho pastavili na viaršyniu śpisu partyi «Jedinaja Rośsija» na vybarach u Dziarždumu. Žurnalisty rušać mif pra prystojnaść.
Rasśledavalniki śćviardžajuć, što Łaŭroŭ žyvie padvojnym žyćciom. U jaho 50 hadoŭ aficyjnaha šlubu, a na samaj spravie — tajemnaja druhaja siamja, paluboŭnica Śviatłana Palakova, zavalenaja darahimi aŭtamabilami i elitnaj nieruchomaściu ŭ Maskvie, Padmaskoŭi i Łondanie.
21-hadovaja padčarka Łaŭrova, dačka Palakovaj, žyvie ŭ Łondanie, u kvatery ŭ supierelitnym rajonie za 4,4 młn funtaŭ.
Siamja Łaŭrova i jahonyja navat dalnija rodzičy lotajuć u słužbovyja kamandziroŭki razam z Łaŭrovym, chacia nie pracujuć u MZS.
Śviatłana Palakova. Jana źniałasia ŭ epizodzie kino
Ale hałoŭnaje, heta adnosiny z aliharcham Aleham Dzierypaskam. «Łaŭroŭ i jaho siamja šmat hadoŭ znachodziacca na ŭtrymańni ŭ aliharcha. Jon apłačvaje im adpačynak. Jany lotajuć na jaho samalotach. Jany płavajuć na jaho jachcie i žyvuć u jaho damach», — śćviardžajuć rasśledavalniki.
Uzamien Łaŭroŭ łabiruje intaresy Dzierypaski: dapamahaŭ atrymać amierykanskuju vizu, a kali ŭ kampanii Dzierypaski paŭstaŭ kanflikt z uładami Hviniei, Łaŭroŭ palacieŭ tudy vyrašać pytańnie (i damohsia svajho). Kali zachodnija krainy ŭviali suprać Dzierypaski sankcyi, Łaŭroŭ ustaŭ na abaronu aliharcha. «Łaŭroŭ hatovy i suśvietnuju vajnu raźviazać dziela sponsara svajoj siamji, zrabiŭšy ŭsich rasijan zakładnikami intaresaŭ Dzierypaski», — pišuć rasśledavalniki.
«Ich sapraŭdnaje žyćcio — heta druhija siemji, jachty, samaloty i pałacy. Karaleŭskaje hłamurnaje žyćcio za košt aliharchaŭ. Voś ideałohija Pucina. Heta pavinna być napisana na płakatach «Jedinoj Rośsii», — reziumuje FBK.
