Doktaru z Połacka dali siem sutak za pierapost artykuła pra Tarajkoŭskaha. Jon abviaściŭ haładoŭku
15 vieraśnia sud u Połacku pakaraŭ aryštam na 7 sutak doktara-psichijatra Połackaj abłasnoj psichijatryčnaj balnicy Vitala Savickaha za pierapost artykuła ŭ sacyjalnaj sietcy, paviedamlaje «Viciebskaja viasna».
Pierapost materyjału byŭ zrobleny jašče 16 červienia va «UKantakcie» ŭ supołcy, jakuju pryznali ekstremisckaj.
Tekst raspaviadaŭ pra žyćcio žonki Alaksandra Tarajkoŭskaha.
Vitala Savickaha zatrymali zranku 14 vieraśnia, kali jon pryjšoŭ u Połacki RAUS pa paviestcy. Doktara abvinavacili ŭ raspaŭsiudzie infarmacyjnaj pradukcyi, jakaja źmiaščaje zakliki da ekstremisckaj dziejnaści ci prapahanduje takuju dziejnaść (art. 19.11 KaAP).
Na sudzie Vital Savicki nie pryznaŭ svajoj viny, pahadziŭšysia z tym, što sapraŭdy pierapościŭ artykuł pra siamju Tarajkoŭskaha. Zaznačyŭ, što ŭ tekście artykuła nie było nijakich zaklikaŭ da hvałtu ci «ekstremisckaj dziejnaści». Miedyk zajaviŭ, što nie viedaŭ pra toje, što supołka ličycca «ekstremisckaj».
