«Pikietavała BČB-vałasami». Dziaŭčynu aštrafavali na 2320 rubloŭ za koler vałasoŭ
Ranicaj 9 vieraśnia na vulicy Adzincova ŭ Minsku zatrymali 19-hadovuju Viktoryju Lovinu. Milicyjantam nie spadabaŭsia koler vałasoŭ dziaŭčyny, tamu jaje zatrymali i advieźli ŭ Frunzienskaje RUUS.
Na Viktoryju skłali pratakoł pa art. 24.23 KaAP, dzie paznačyli, što jana «praviała pikietavańnie, majučy na hałavie afarboŭku vałasoŭ bieł-čyrvona-biełaha koleru», paviedamlajuć pravaabaroncy.
Sud nad dziaŭčynaj adbyŭsia ŭ toj ža dzień u sudzie Frunzienskaha rajona. Viktoryja raspaviała, što vałasy pafarbavała amal paŭhoda tamu dziela žartu.
Adrazu jany byli biełyja, a zzadu niekalki pasmaŭ čyrvonaha koleru. Ale ŭ dziaŭčyny adraśli čornyja karani vałasoŭ, tamu jany ciapier majuć afarboŭku «čorna-bieła-čyrvonuju».
Sudździa Natalla Buhuk paprasiła pa skajpie Lovinu paviarnucca i pakazać, jak vyhladaje koler vałasoŭ. Sudździa adznačyła, što ŭ jaje «vielmi cikavaja i aryhinalnaja pryčoska» i pryznała Viktoryju vinavataj u pikietavańni. Vynik — štraf u pamiery 2320 rubloŭ (80 bazavych).
