Biełarusy raźvitvajucca z zanačkami. Pradali bankam u žniŭni miljard dalaraŭ
Heta rekord z pačatku hoda
Nacbank štomiesiac manitoryć, kolki valuty kuplaje nasielnictva. Što bačna pa hetych danych, apublikavanych pavodle vynikaŭ vaśmi miesiacaŭ 2021 hoda?
Pieršaje — upieršyniu za hety hod biełarusy pradali bolš za miljard dalaraŭ za adzin miesiac. Dla paraŭnańnia, u studzieni prodaž skłaŭ $613 młn, u krasaviku — $883 młn, u červieni — $909 młn, źviarnuŭ uvahu telehram-kanał «Našy hrošy».
Druhoje — sumarna za pieryjad sa studzienia pa žnivień nasielnictva ŭsio jašče zastajecca čystym pakupnikom valuty.
Biełarusy za hety čas kupili na $316 młn bolš, čym pradali. Ale kali hladzieć pamiesiačna statystyku, to bačna, što situacyja źmianiłasia.
Kali raniej, sa studzienia pa červień uklučna, nasielnictva bolš kuplała valutu, čym pradavała, to ŭžo ŭ apošnija dva miesiacy situacyja advarotnaja: za lipień było pradadziena na $47 młn, a za žnivień — na $94 młn bolš.
Treciaje — kupla i prodaž valuty dzielicca ŭnutry jašče na dźvie katehoryi: abarot najaŭny i bieznajaŭny. Ź miljarda dalaraŭ, jaki nasielnictva pradało ŭ žniŭni, $740 młn — prodaž u abmieńnikach.
Kali hladzieć statystyku pa miesiacach na praciahu hoda, stanovicca zrazumieła, što biełarusy stabilna zdajuć najaŭnuju valutu bolš, čym kuplajuć.
A voś pa bieznajaŭnym raźliku situacyja advarotnaja, nasielnictva bolš aktyŭna kuplaje takim čynam valutu, čym pradaje. Kupla valuty pa bieznajaŭnym raźliku — heta, naprykład, pieravod hrošaj z rublovaj karty na valutnuju.
I kali sa studzienia pa červień situacyja na rynku kupli-prodažy valuty nasielnictvam składvałasia pad upłyvam vynikaŭ bieznajaŭnaha abarotu, to zaraz pieršynstvo pierachapiła hatoŭka.
