Siłaviki razahnali letnik johaŭ pad Barysavam
5 vieraśnia ŭ łahiery pad Barysavam siłaviki razahnali schod ludziej, jakija praktykujuć vipasanu (heta asablivy vid miedytacyi). Pra heta «Miedyjazonie» raspavioŭ adzin z udzielnikaŭ, jaki pažadaŭ zastacca ananimnym.
Pavodle jaho słoŭ, usiaho na mierapryjemstvie pad Barysavam było kala 70 čałaviek, u tym liku zamiežniki. Jano pačałosia 3 vieraśnia i pavinna było praciahvacca dziesiać dzion.
«Ranicaj my miedytavali, i ja chacieŭ pajści ŭ pakoj, kab praciahnuć miedytacyju pa dazvole nastaŭnika tam, ale, dajšoŭšy da dźviarej, ubačyŭ dvuch čałaviek u cyvilnym i kiepkach sa ściaham Biełarusi, čyrvona-zialonym. Za imi byli prykładna 10—15 [čałaviek] u formie AMAPa z dubinkami, jakija išli prosta na nas. Dziaŭčynu adnu adšturchnuli ad dźviarej, i jana ŭpała trochi», — raspavioŭ surazmoŭca «Miedyjazony».
Usich udzielnikaŭ amapaŭcy sabrali ŭ adnoj zale, a paśla «vyklikali arhanizataraŭ i doŭha havaryli ź imi».
«Supracoŭniki prychodzili i rabili fatahrafii zały i ŭsich nas. Niekatoryja chacieli schadzić u prybiralniu, bo nas trymali dzieści 1,5-2 hadziny, ale vychodzić nielha było, navat kali vielmi chaciełasia. Paśla hetaha arhanizataraŭ i zamiežnych hramadzian pavieźli ŭ RAUS, dzie ich stali raspytvać pra toje, što adbyvajecca i što jany ŭsio robiać tut. Nas adpuścili prykładna praz 10 chvilin, kali pavieźli arhanizataraŭ i zamiežnikaŭ».
Pa słovach udzielnika, situacyja ŭ łahiery doŭžyłasia kala dźviuch hadzin. Jašče prykładna stolki ž arhanizatary i zamiežniki praviali ŭ adździele milicyi.
«Paśla RAUS zamiežnikaŭ i arhanizataraŭ pryvieźli nazad. Usim namiaknuli, što treba pakinuć łahier na praciahu sutak, inakš jany znoŭ pryjduć i ŭžo buduć pa-inšamu havaryć. A paźniej źmianili patrabavańni i skazali, što kali my nie chočam prablem užo siońnia, to źjechać treba na praciahu 3-ch hadzin», — raspavioŭ surazmoŭca.
Jon dadaŭ, što arhanizatary «byli ŭ šoku», «paprasili prabačeńnia i chutka dapamahli ŭsim źjechać». Pa infarmacyi surazmoŭcy «Miedyjazony», na arhanizataraŭ skłali pratakoły pa artykule ab parušeńni paradku arhanizacyi abo praviadzieńnia masavych mierapryjemstvaŭ (artykuły 24.23 KaAP).
