Hiermanija bieź Mierkiel. Chto moža stać nastupnym kancleram i čaho ad jaho čakać
U kancy vieraśnia Anhieła Mierkiel pakinie post niamieckaha kanclera. Za 16 hadoŭ na hetaj pasadzie jana sutyknułasia z ekanamičnym i mihranckim kryzisami, Breksitam, jaki pahražaŭ samoj idei ES, jeŭrapiejskim daŭhavym kryzisam i, narešcie, z pandemijaj kavidu. Va ŭsich hetych situacyjach Mierkiel prajaviła siabie jak vydatny kryzisny mieniedžar i vybitny palityk.
Fota flickr.com.
Nastupny niamiecki kancler budzie pavinien uličvać mocnyja baki Mierkiel, to-bok jaje talent da kiravańnia dziaržavaj i vysokuju zdolnaść spraŭlacca z kryzisami. Jamu taksama pryjdziecca mieć spravu z nastupstvami jaje najbolš značnaha minusa — niazdolnaści mieć stratehičnaje bačańnie budučyni Jeŭropy.
Imia novaha kanclera stanie viadoma paśla fiederalnych vybaraŭ, jakija projduć u Hiermanii 26 vieraśnia. Sama Mierkiel padtrymlivaje kandydaturu Armina Łašeta, 59-hadovaha kiraŭnika partyi Chryścijanski demakratyčny sajuz i premjera niamieckaj ziamli Paŭnočny Rejn — Viestfalija. Raźličvajecca, što partyja Łašeta moža atrymać na vybarach kala 20% hałasoŭ — ryzykoŭnyja ličby, ale ich moža chapić dla taho, kab Łašet staŭ nastupnym kancleram.
Kali tak i zdarycca, Łašet abiacaje pavysić vydatki na abaronnyja patreby da 2% VUP, kab vykanać abaviazki Hiermanii pierad NATA. Što datyčycca ŭnutranaj biaśpieki, lidar chryścijanskich demakrataŭ žadaje vysłać z krainy patencyjnych terarystaŭ i ŭzmacnić baraćbu z arhanizavanaj złačynnaściu.
Pra adnosiny z Rasijaj Łašet taksama vykazvaŭsia. Jon ciarpima stavicca da palityki Kramla i ŭ svoj čas navat vyražaŭ simpatyi rasijskamu ŭradu. Tym nie mienš, lidar chryścijanskich demakrataŭ patrabavaŭ ad Maskvy tłumačeńnia ŭ suviazi z atručvańniem Alaksieja Navalnaha i navat pahražaŭ Kramlu sankcyjami, kali Rasija pačnie vykarystoŭvać hazapravod «Paŭnočny patok-2» dla cisku na Ŭkrainu.
Dobryja šansy na pasadu kanclera maje taksama Ołaf Šolc, ciapierašni vice-kancler Hiermanii i ministr finansaŭ. Jon asabliva viadomy svajoj pracaj padčas pandemii. Naprykład, Šolc kantralavaŭ vypłatu niamieckim uradam 750 miljardaŭ jeŭra, nakiravanych na dapamohu niamieckim kampanijam i ich supracoŭnikam u kavidny kryzis.
Padčas pieradvybarčaj kampanii Šolc zrabiŭ šerah vykazvańniaŭ na temu źniešniaj palityki. Jon padkreślivaje, što miežy Jeŭropy bolš nie pavinnyja padviarhacca hvałtoŭnamu pieradziełu nakštałt taho, što ździejśniła Rasija, kali anieksiravała Krym. Ale pry hetym Šolc hatovy supracoŭničać z Rasijaj, kab zachavać biaśpieku ŭ Jeŭropie. Unutry krainy vice-kancler atrymaŭ papularnaść padčas pavodki letam 2020 hoda, kali jon pakazaŭ siabie vopytnym upraŭlencam.
Narešcie, na post kanclera pretenduje Annalena Biorbak, kandydatka ad partyi «zialonych». Spadarynia Biorbak — samaja maładaja z usich kandydataŭ, joj 40 hadoŭ. Z 2013 hoda Annalena źjaŭlajecca deputatkaj Bundestaha, jana zajmajecca prablemami siamji i ekałohii. Ličycca, što z troch kandydataŭ Biorbak maje mienš za ŭsio šansaŭ na pieramohu, adnak jaje partyja maje dobryja šansy ŭvajści va ŭrad.
Jak pradstaŭnica partyi «zialonych», Biorbak zasnavała svaju pieradvybarčuju kampaniju na pytańniach ekałohii. Taksama viadoma, što Annalena mocna cikavicca prablemami ahulnajeŭrapiejskaj palityki i vystupaje za adzinuju abarončuju palityku ES.
Biorbak stavicca da Kramla dosyć naściarožana - naprykład, jana nie padtrymlivaje zapusk «Paŭnočnaha patoku-2». Viasnoj 2021 hoda, kali Rasija ŭzmacniła svoj kantynhient na miažy s Ukrainaj, Annalena prapanavała ŭ adkaz uzmacnić cisk na Maskvu. Pa danych vydańnia Bloomberg, Kreml navat sprabavaŭ pieraškadžać pieradvybarčaj kampanii Biorbak. Dla hetaha nibyta vykarystoŭvalisia chakierskija ataki i dezinfarmacyja ŭ sacsietkach.
Nastupny niamiecki ŭrad, jak ličycca, budzie kaalicyjnym. To bok, akramia adznačanych vyšej partyj, svoj upłyŭ na niamieckuju palityku budzie akazvać adna z nastupnych partyj: Svabodnyja demakraty, krajnie pravaje abjadnańnie «Alternatyva dla Hiermanii» i niamieckija levyja.
Analityki inviestycyjnaha banka Goldman Sachs nazyvajuć try asnoŭnyja prablemy, ź jakimi budzie pavinien pracavać nastupny niamiecki kancler. Pieršaja ź ich — klimatyčny kryzis i nieabchodnaść źnizić vykidy vuhlarodu ŭ atmaśfieru, druhaja — stareńnie niamieckaha nasielnictva. Narešcie, analityki śćviardžajuć, što aryjentavanaja na ekspart ekanomika Hiermanii moža paciarpieć praź ciapierašnija trendy, nakiravanyja suprać hłabalizacyi.
Pakul ciažka skazać, chto stanie pierajemnikam Mierkiel. Apošnija apytanki addajuć 24% partyi Šolca, 21% - chryścijanskim demakratam i 17% - «zialonym». Ekśpierty kažuć, što pry takim raskładzie isnuje jak minimum try varyjanty kaalicyj, jakija možna budzie pabačyć u niamieckim uradzie. Mahčyma, ich farmiravańnie taksama zojmie niekalki miesiacaŭ, paśla čaho ŭ niamieckaj palitycy narešcie nastanie stabilnaść.
