«Heta asabistaja pomsta Łukašenki za śmiełaść dvum vybitnym biełarusam». Što kažuć pra prysud Kaleśnikavaj i Znaku
10 i 11 hadoŭ kałonii — stolki dali Maksimu Znaku i Maryi Kaleśnikavaj za ŭdzieł u vybarčaj kampanii. «Naša Niva» sabrała reakcyju palitykaŭ i hramadstva na prysud.
Maksim Znak i Maryja Kaleśnikava na abviaščeńni prysudu. Skrynšot «RIA Naviny»
Śviatłana Cichanoŭskaja:
«Režymu b vielmi chaciełasia bačyć Maksa i Maryju razdušanymi i źniasilenymi. Ale my bačym našych hierojaŭ mocnymi i volnymi ŭnutry. Jany vyjduć na volu značna raniej. Vydumanyja dla ich terminy nie pavinny pałochać nas, bo Maksim i Maša hetaha b dakładna nie chacieli. Jany b chacieli, kab my ŭspomnili, jak uśmichajecca Maša, i pasłuchali, jak śpiavaje Maksim».
Franak Viačorka, daradca Cichanoŭskaj:
«Heta byŭ nie sud, a fars. Imitacyja ad pačatku da kanca. Nijakich dokazaŭ. Nie było navat sprobaŭ dakazać «vinu». Heta asabistaja pomsta Łukašenki za śmiełaść dvum vybitnym biełarusam. Z adnaho boku, baluča nazirać za hetym farsam. Ź inšaha boku, adčuvaju honar — za Maksima i Maryju, — što nie skarylisia. Pra takich, jak jany, kažuć: čałaviek sa stryžniem».
Uładzimir Niaklajeŭ, paet:
«U kryminalnaj spravie Kaleśnikavaj i Znaka niama ničoha kryminalnaha i nie moža być, bo jany prosta ŭdzielničali ŭ vybarčaj kampanii zhodna z Kanstytucyjaj. Pakolki zakony ŭ nas ciapier nie dziejničajuć, a dziejničaje prava, tak skažam, asabistaha podpisu pad sudovym vyrašeńniem, nichto nie čakaŭ, što budzie ŭličana, što ludzi nie parušali zakonaŭ. I tym nie mienš toje, što siońnia ahučana ŭ sudzie, mianie asabista strašenna ŭraziła.
Heta śviedčyć tolki pra adno — pra pasyły na Zachad pra hatoŭnaść režymu da niejkich pieramoŭ, źmienaŭ u svajoj palitycy ŭ adnosinach da hramadstva. Nasamreč režym nie źbirajecca hetaha rabić i ŭsialak demanstruje, što hramadstva budzie pad presam katavańniaŭ i ździekaŭ da toj pary, pakul nie pryznajuć pravatu.
Tut uźnikaje palityčny tupik, ź jakoha zvyčajnymi sposabami, pa-mojmu, niemahčyma vyjści. I što rabić u takich varunkach — ja łamaju hałavu bolš za hod i nie znachodžu adkazu. Bo takoj situacyi, jakaja skłałasia ŭ Biełarusi, na majoj pamiaci nie było i niama praktyki, jak jaje vyrašyć».
Siarhiej Zikracki, advakat:
«Ja peŭny čas byŭ abaroncam Maksima Znaka i bačyŭ tady častku materyjałaŭ spravy, abvinavačańnie, jakoje było na toj momant vystaŭlena. Ja absalutna ŭpeŭnieny, što heta niezakonny prysud i niama nijakich dokazaŭ, što Maksim i Maryja ździajśniali procipraŭnyja dziejańni. I zakrytaje pasiadžeńnie jakraz śviedčyć pra adsutnaść dokazaŭ.
My cudoŭna viedajem, jaki abjom materyjałaŭ spravy byŭ, i toje, što heta ŭsio razhledzieli mienš čym za miesiac, nievierahodna. Zvyčajna pasiadžeńni musili b być na niekalki miesiacaŭ. Heta pakazvaje, jak jany śpiašalisia vynieści prysud, i jašče raz padkreślivaje: jon absalutna nieabhruntavany.
Vielmi składana davać prahnozy pra stan Maksima, bo ja raniej nikoli nie byŭ kryminalnym advakatam i nie bačyŭ, što ź ludźmi robić zona, jakimi jany vychodziać paśla taho, jak adbyvajuć pakarańnie. Ja bačyŭ Maksima, pakul u mianie jašče była advakackaja licenzija. I kali my sustrakalisia ŭ SIZA, jon byŭ aptymistyčny, zachoŭvaŭ siłu duchu, i ja vielmi spadziajusia, što jamu ŭdasca jaje zachavać i nadalej».
Luboŭ Sobal, rasijski apazicyjny palityk:
«Žachlivyja prysudy, žorstkija. Bolš, čym dajuć zabojcam. Vinavatyja jany tolki ŭ tym, što dapamahali Śviatłanie Cichanoŭskaj na vybarach prezidenta ŭ 2020 hodzie pieramahčy Łukašenku, a paźniej adstojvali pravy biełarusaŭ žyć u narmalnaj kvitniejučaj krainie.
Zyču Maksimu i Maryi tryvałaści i zdaroŭja. Nikoli nie była znajoma asabista, ale ciažka nie zachaplacca ich siłaj duchu. Nijakija prysudy nie admieniać narodnuju luboŭ i padtrymku».
Kaciaryna Snycina, baskietbalistka:
«10 i 11 hadoŭ pazbaŭleńnia voli dla ludziej, jakija chočuć tolki adnaho — zrabić krainu lepšaj. Ničoha inšaha ad režymu ja nie čakała. Kožny taki prysud daje mnie siłaŭ i złości praciahvać daŭbić hetu ścianu. Adzinaje dobraje, što zdaryłasia siońnia, — heta toje, što tata Mašy Kaleśnikavaj siońnia trapiŭ na sud i ŭbačyŭ dačku».
Pieter Stano, pres-sakratar źniešniepalityčnaj słužby ES:
«ES škaduje pra pastajannuju aburalnuju niepavahu minskim režymam pravoŭ čałavieka i asnoŭnych svabod narodu Biełarusi. ES taksama paŭtaraje svaje patrabavańni ab nieadkładnym i biezahavoračnym vyzvaleńni ŭsich palityčnych viaźniaŭ u Biełarusi (u ciapierašni čas ich bolš za 650), uklučajučy Kaleśnikavu i Znaka, žurnalistaŭ i ŭsich ludziej, jakija znachodziacca za kratami za abaronu svaich pravoŭ. Biełaruś musić prytrymlivacca mižnarodnych damoŭlenaściaŭ i svaich abaviazkaŭ u ramkach AAN i ABSIE. ES praciahnie svaje namahańni pa pryciahnieńni vinavatych da adkaznaści za žorstkija represii z boku biełaruskich uładaŭ».
