Śledstva vyznačyłasia ź viersijaj śmierci Vitala Šyšova ŭ Kijevie, ale pakul nie raskryvaje infarmacyju
Ministr unutranych spravaŭ Ukrainy Dzianis Manastyrski zajaviŭ, što śledstva pa spravie śmierci kiraŭnika «Biełaruskaha doma va Ukrainie» Vitala Šyšova ŭžo vyznačyłasia z viersijaj trahiedyi. Adnak kankretna nie adkazaŭ na pytańnie.
«Ja b addaŭ prava abviaščeńnia vynikaŭ rasśledavańnia mienavita palicyi. Mahu skazać, što palicyja zaraz pryciahnuła mižnarodnych ekśpiertaŭ dla recenzij zaklučeńniaŭ atrymanych ekśpiertyz. Kali buduć atrymanyja vysnovy, my abvieścim infarmacyju, jakaja jość», — skazaŭ jon.
Na ŭdakładniajučaje pytańnie žurnalista: zabojstva abo samahubstva, Manastyrski adkazaŭ: «Dla śledstva zrazumieła, ale chaj usio ž taki skaža samo śledstva».
Vital Šyšoŭ, adzin z zasnavalnikaŭ «Biełaruskaha doma va Ukrainie», prapaŭ ranicaj 2 žniŭnia ŭ Kijevie. Jon pajšoŭ na ranišniuju prabiežku i nie viarnuŭsia. Na nastupny dzień jaho znajšli paviešanym u adnym ź lesaparkaŭ horada.
