Fakultatyŭ ad pravasłaŭnaj carkvy ŭvodziać navat u polskich škołach. A što nakont inšych kanfiesij?
Z hetaha navučalnaha hoda ŭ škołach novy fakultatyŭ — «Asnovy duchoŭna-maralnaj kultury i patryjatyzmu». Jaho buduć pravodzić dla 5-6-ch kłasaŭ. Prahrama składałasia razam z pravasłaŭnaj carkvoj. Ale jak śviatary buduć pracavać ź dziećmi inšaha vieravyznańnia?
Vieści novy fakultatyŭ mohuć jak baciuški, tak i nastaŭniki. Na ŭrokach płanujuć zakładać u charaktar dziaciej dabryniu, miłasernaść, pavahu da inšych, zdolnaść daravać i dapamahać.
«Dzie vy pračytali, što heta pravasłaŭny fakultatyŭ? — ździviŭsia Fiodar Poŭny, staršynia sinadalnaha adździeła pa supracoŭnictvie sa śvieckimi ŭstanovami adukacyi BPC. — Havorka idzie pra žadańnie viedać historyju, duchoŭnuju u tym liku, svajho naroda, hetaj ziamli. Sapraŭdnuju, a nie prydumanuju. Naohuł vielmi dziŭny niespakoj na pustym miescy».
Raniej Poŭny vykazvaŭ mierkavańnie, što adukacyja musić być vyklučna śvieckaj.
Katalicki kaścioł u abmierkavańni prahramy nie ŭdzielničaŭ.
«Dla nas taksama była navina pačuć, što taki fakultatyŭ budzie,
— kaža ksiondz Juryj Sańko, jaki časova vykonvaje abaviazki pres-sakratara Kanfierencyi katalickich biskupaŭ u Biełarusi. — Nie viedajem, jak heta budzie arhanizavana: ci tam pavinien prysutničać kłas całkam, ci vučań moža vyrašyć, choča jon iści abo nie. Pra što tam buduć razmovy, taksama nie viedajem. My bačyli tolki fotazdymak padručnika.
U nas pracujuć katechietyčnyja adździeły, jakija adkazvajuć za adukacyju dziaciej i moładzi ŭ kožnaj dyjacezii. Nakolki viedaju, jany aficyjnaha zaprašeńnia na abmierkavańnie prahramy fakultatyvu nie atrymlivali. Dumaju, heta vyklučna inicyjatyva pravasłaŭnaj carkvy, bo ŭ jaje, zdajecca, adzinaj padpisana damova ab supracoŭnictvie ź Ministerstvam adukacyi.
Heta pytańnie — u jakim śviecie buduć pradstaŭleny inšyja kanfiesii i naohuł, ci budzie pra ich razmova. Napeŭna, pavinna być, bo niemahčyma kazać tolki pra pravasłaŭnych viernikaŭ — u haradach i vioskach jość i kaścioły, i miačeci, i sinahohi, i pratestanckija damy.
Važna nie pasiejać kryŭdy pamiž dziećmi, jany ž vielmi čułyja. Kab nie było paźniej dyskryminacyi».
Na dumku Juryja Sańko, najbolš vostra pytańnie moža stajać u Hrodzienskaj vobłaści i niekatorych miaścinach zachodniaj Viciebščyny, dzie šmat katalikoŭ.
U Hrodnie i Vaŭkavysku, naprykład, jość polskija škoły, dzie daŭno vykładajuć pradmiet «Relihija» sumiesna z kaściołam. Novy fakultatyŭ ad pravasłaŭnaj carkvy ŭvodziać i tam, nijakich vyklučeńniaŭ.
«Naša škoła dziaržaŭnaja, tamu my pracujem pa prahramach, zaćvierdžanych dla ŭsich ustanoŭ adukacyi», — koratka prakamientavała «Našaj Nivie» dyrektarka škoły №8 u Vaŭkavysku Halina Bułaj.
