«Spaźniŭsia na karparatyŭ». «Avatar», jakoha zatrymała DAI, raspavioŭ, što heta było
Minskija daišniki zatrymali kiroŭcu «Reno», jaki byŭ trochi napadpitku. Zdavałasia b zvyčajnaja situacyja, kali b nie adno «ale» — mužčyna byŭ litaralna sinim, u aŭtentyčnym kaściumie piersanaža filma «Avatar». «Naša Niva» pahavaryła ź im.
Maksim pracuje ajcišnikam. Kaža, što ŭsio pačałosia z konkursu kaściumaŭ i karparatyvu.
«U nas byŭ karparatyŭ, na jakim razyhryvali novuju hulniavuju prystaŭku PlayStation. Heta byŭ pryz za lepšy kaścium.
Prystaŭka ŭ Biełarusi kaštuje 2200 rubloŭ, i ja ćviorda vyrašyŭ jaje vyjhrać. Padumaŭ, što kali tracić sto rubloŭ, to takija kaściumy buduć u kožnaha, tak nie pieramožaš. A kali tracić biespadstaŭna šmat, to ja budu takim adzinym.
Ale nastolki zaparyŭsia z kaściumam, što spaźniŭsia na rehistracyju i hałasavańnie i zastaŭsia ni z čym: pryjechaŭ, kali ŭsio skončyłasia. Pryčym, usim było zrazumieła, što ja b pieramoh, kali b paśpieŭ, — kaža Maksim. — Na kaścium ja patraciŭ šmat vysiłkaŭ i hrošaj, zapłaciŭ bolš za 300 dalaraŭ. Najmaŭ hrymioraŭ, mianie tolki hadzin 6-8 farbavali, dla hetaha pryjšłosia pahalić usio cieła: i hałavu, i baradu, i nohi, i ŭsio astatniaje. Chadžu voś ciapier z kalučymi nahami.
Linzy taksama byli, nasiŭ ich hadzin 20, praz heta paškodziŭ vočy.
A paśla jašče i nož, jaki byŭ častkaj kaściumu, upaŭ i złamaŭsia. Heta byŭ nož z kamnia i kostki, zrobleny pa staroj technałohii, sapraŭdny jak dahistaryčny nož. I jon upaŭ na asfalt i raźbiŭsia.
Heta abyjšłosia mnie jašče niedzie ŭ 300 dalaraŭ.
Tamu ja rastroiŭsia, paśla karparatyva pajechaŭ jašče na Zybickuju, tam prahulaŭsia…
A paśla ja nie viedaju, što na mianie najšło, čamu ja sieŭ za styrno. Uvieś žach situacyi ja ŭśviadomiŭ, tolki kali ŭbačyŭ mihałki.
Spynili mianie metanakiravana. Chtości pazvaniŭ u DAI i skazaŭ, što bačyŭ, jak ja napadpitku siadaŭ u aŭto. I daišniki jechali ŭžo kankretna pa mianie.
Ale daišniki byli vietlivymi, paśmiajalisia, navat sfotkalisia sa mnoju. My ź imi cikava pahavaryli. Kaniečnie, pažuryli mianie trochi, ale ž usio ŭžo zdaryłasia. Ciapier paniasu pakarańnie.
Ale ŭ mianie jość pytańnie nakont pramile: kali mianie spynili, to ja dychaŭ u trubačku, było 0,8. Paśla na miedahladzie pakazała ŭvohule 0,6, i mianie prosta adpuścili dadomu, zabraŭšy mašynu. A ciapier pišuć, što ŭ mianie było 1,9 pramile — niešta ja nie pamiataju takich ličbaŭ.
Dziŭna, treba ŭ DAI raźbiracca. I vielmi kiepska, što historyja ŭžo zavirusiłasia, bajusia, što praz heta mnie daduć maksimum — 5800 rubloŭ štraf i pazbaviać pravoŭ.
Na pracy pakul usie hladziać na mianie sa spačuvańniem ci paśmichajucca i žartujuć. Vinavaciać taksama — dy ja i sam siabie nie apraŭdvaju.
Ale chvalujusia za baćkoŭ, jany ŭsio ŭsprymajuć blizka da serca. Spadziajusia, sam paśpieju im akuratna raskazać pierš, čym jany pračytajuć niedzie artykuł pra mianie.
Maje vysnovy z hetaj historyi — nikoli nie siadać pjanym za styrno. Navat nie dapuskać mahčymaści dla siabie heta zrabić. Bo ałkahol źmianiaje čałavieka i možna zrabić toje, što ćviarozym i nikoli b nie padumaŭ».