Zabrudžvańnie pavietra źviazali z uzroŭniem psichičnych zachvorvańniaŭ
Jak vyśvietlili navukoŭcy, žyćcio ŭ rehijonach z brudnym pavietram spryjaje bolšaj ciažkaści mientalnych chvarob.
Fota pixabay.com.
Daśledavańnie, u jakim udzielničali 13 tysiač žycharoŭ Łondana, pralivaje śviatło na dahetul nieviadomyja nastupstvy zabrudžvańnia pavietra. Pa jaho vynikach navukoŭcy pryjšli da vysnovy, što maleńkaje pavyšeńnie ŭzroŭniu dyjaksidu azotu ŭ pavietry (na 15 mkh/m³) vyklikała ŭ vypadku psichičnych chvarob pavyšeńnie na 32% vierahodnaści ambułatornaj dapamohi i na 18% — vierahodnaści špitalizacyi, piša Guardian.
Praca, apublikavanaja ŭ vydańni British Journal of Psychiatry, zasnavanaja na adsočvańni pacyjentaŭ z paŭdniovaha Łondana, pačynajučy ad ich pieršaha zvarotu ŭ słužby psichałahičnaj dapamohi. Pry hetym navukoŭcy taksama aceńvali ŭzrovień zabrudžvańnia pavietra ŭ miescy žycharstva respandentaŭ.
Zhodna z pracaj, najbolšy ŭpłyŭ na ciažkaść chvarob akazvaje zabrudžvańnie dyjaksidam azotu, šmat u čym źviazanaje z vykidami ad pracy dyzielnych ruchavikoŭ. Ale navukoŭcy taksama znajšli suviaź pamiž ciažkaściu chvarob i zabrudžvańniem tak zvanymi miełkimi čaścinkami, jakija traplajuć u pavietra padčas spalvańnia vykapniovaha paliva.
Aŭtary daśledavańnia śćviardžajuć, što ich vysnovy, chutčej za ŭsio, možna prymianić da bolšaści vialikich haradoŭ u raźvitych krainach. Važna, što navat maleńkaje źnižeńnie ŭzroŭniu zabrudžvańnia pavietra dazvolić źnizić uzrovień zachvorvańniaŭ i adpaviedna dapamoža sistemie achovy zdaroŭja sekanomić šmat hrošaŭ — u vypadku z Brytanijaj razmova moža iści pra dziasiatki miljonaŭ funtaŭ. Kab damahčysia hetaha, možna, naprykład, stvarać ci pašyrać zony, u jakich vykidy ŭ atmaśfieru buduć abmiežavanyja.
