Kamiedyja, avanhard i niamiecki ekspresijanizm. Fiestyval u Minsku pakazvaje niamoje kino pad žyvuju muzyku
Camy niezvyčajny biełaruski kinafiestyval «Kiniemo» prachodzić u Minsku prosta ciapier. Čorna-biełyja niamyja filmy pakazvajucca na śviežym pavietry ŭ žyvym muzyčnym supravadžeńni. Fest miarkuje piać viečaroŭ va ŭnutranym dvoryku Miemaryjalnaha muzieja-majsterni Zaira Azhura, na jakich možna častkova zaznać atmaśfieru daŭnišniaha kinasieansa. Pakazy pačalisia 17 červienia i adbyvajucca raz na tydzień.
Fota sa staronki fiestyvalu ŭ fejsbuku.
Mižnarodny open-air fiestyval niamoha kino i sučasnaj muzyki prachodzić užo dziaviaty raz. Albo vośmy z pałovaj: letaś praz karanavirus i składanuju situacyju na žnivieńskich vulicach «Kiniemo» zładziła tolki dva sieansy, a pakazy ŭ Hrodnie pieraniesła całkam.
Niekalki prahram ź minułaj edycyi pierajšli ŭ sioletniuju, i ŭ padborcy akazalisia kamiedyja, «vuličny film», avanhard, niamiecki ekspresijanizm i pakaz karotkamietražak. Usio heta supravadžajecca žyvym vykanańniem admysłova napisanaj muzyki — u fiestyvalu navat majecca svoj muzykalny kaściak, chacia koła kampazitaraŭ i vykanaŭcaŭ, pavodle arhanizataraŭ, uvieś čas pašyrajecca. Takim čynam, kožny ź piaci pakazaŭ — unikalny.
«Kiniemo» pačałosia z kamiedyi «Siem šansaŭ» adnaho z troch vialikich komikaŭ amierykanskaha kino Bastara Kitana. «Jašče dziesiać hadoŭ tamu hledačy viedali tolki Čaplina. Ale za čas isnavańnia fiestyvalu my pryvučyli publiku da taho, što jość i Bastar Kitan, i Harald Łojd. Dumaju, pra šmat inšych cudoŭnych komikaŭ ludzi jašče daviedajucca», — kaža prahramny kaardynatar Hiera Hlik.
Na fiestyval trapiŭ avanhardny film Rene Klera «Paryž zasnuŭ», pa siužecie jakoha čałaviek pračynajecca, vychodzić u horad i znachodzić jaho pustym. Jak kažuć arhanizatary, film pieraklikajecca z našaj rečaisnaściu padčas epidemijałahičnych abmiežavańniaŭ. Muzyku napisaŭ Vital Epaŭ, a vykonvacca jana budzie saksafonam, fartepijana i termienvoksam.
Fota sa staronki fiestyvalu ŭ Fejsbuku.
Stužka Klera taksama jość u padborcy karotkamietražak, a hety pakaz «ahučvajecca» pieramožcami śpiecyjalnaha konkursu siarod studentaŭ-kampazitaraŭ ź Biełarusi i Polščy. Polskija ŭdzielniki, na žal, nie zmohuć pryjechać na pakaz.
Znakamitaja kłasika ŭvasobicca ŭ «Kabiniecie doktara Kalihary» Robierta Vine. Letaś filmu spoŭniłasia sto hadoŭ, muzykalnaje supravadžeńnie da jaho napisała Volha Padhajskaja. Jašče adna niamieckaja karcina prahramy budzie pakazana akurat u hety čaćvier — «Asfalt» Džo Meja.
«Kiniemo» ŭ Hrodnie, pieraniesienaje ź minułaha hoda, u vyniku nie adbudziecca: «My ŭžo rychtavali afišu, kali haradzienskaja placoŭka skazała, što nie maje mahčymaści nas pryniać. Tady my vyrašyli pamianiać łakacyju, iduć pieramovy, mahčyma, pakazy adbuducca ŭ inšym horadzie».
Fiestyval u Minsku praciahniecca da 15 lipienia. Arhanizatary rajać brać z saboj ciopłaje adzieńnie, dyvanki, pledy i parasony.
