Mierkiel zhadała Biełaruś padčas pramovy ab napadzie nacysckaj Hiermanii na SSSR
FRH pryznaje svaju viečnuju adkaznaść za złačynstvy, źviazanyja z napadam nacysckaj Hiermanii na Saviecki Sajuz 22 červienia 1941 hoda.
Pra heta zajaviła kancler FRH Anhieła Mierkiel u svaim videa, apublikavanym u subotu. Zvarot prymierkavany da 80-hodździa z momantu ŭvarvańnia ŭ SSSR, paviedamlaje Deutsche Welle.
«Dla nas, niemcaŭ, heta nahoda dla soramu», — adznačyła kiraŭnik niamieckaha ŭrada. Miljony ludziej zahinuli, asabliva — na terytoryjach, jakija siońnia naležać Rasii, Ukrainie i Biełarusi, a taksama krainam Bałtyi, skazała jana.
Nielha zabyvać, što «my — u daŭhu pierad miljonami achviar i ich naščadkami», dadała kancler.
Pry hetym fiederalny kancler nahadała, što, niahledziačy na žudasnyja padziei vajny, mnohija praciahnuli Bierlinu ruku prymireńnia. Za heta Hiermanija adčuvaje hłybokuju ŭdziačnaść, padkreśliła jana.
Taksama Mierkiel asabliva adznačyła palityku prezidenta SSSR Michaiła Harbačova, dziakujučy jakoj Hiermanija zmahła mirna uźjadnacca ŭ 1990 hodzie i z tych časoŭ raźvivać hramadzianskija suviazi pamiž dźviuma krainami.
U svaim zvarocie kancler FRH zakranuła i niadaŭnija padziei na postsavieckaj prastory. Ź vialikim škadavańniem jana vykazałasia ab tym, što «aktyŭnaść hramadzianskaj supolnaści ŭ Rasii,
a taksama ŭ Biełarusi, u apošni čas abmiežavanaja — bolš taho, stała niemahčymaj».
«Kali mirnyja demanstranty i niepažadanyja (uładam) pradstaŭniki apazicyi akazvajucca za kratami, heta nakładvaje ciažki adbitak na našy adnosiny», — padkreśliła kiraŭnik hiermanskaha ŭrada. Pavodle jaje słoŭ, anieksija Kryma i padtrymka sieparatystaŭ na ŭschodzie Ukrainy — parušeńni mižnarodnaha prava. Dla Hiermanii, jak i dla ŭsiaho ES, heta nieprymalna, upeŭnienaja Mierkiel.
