Lidary «Vialikaj siamiorki» zaklikali pravieści novyja prezidenckija vybary ŭ Biełarusi
Krainy Hrupy siami (G7) zaklikali biełaruskija ŭłady pravieści novyja svabodnyja i sumlennyja vybary prezidenta. Pra heta havorycca ŭ kamiunikie, pryniatym u niadzielu pa vynikach trochdzionnaha samitu lidaraŭ niefarmalnaha abjadnańnia Vialikabrytanii, Hiermanii, Italii, Kanady, ZŠA, Francyi i Japonii ŭ horadzie Karbis-Bej.
«My zaklikajem režym źmianić kurs i vykanać rekamiendacyi niezaležnaj ekśpiertnaj misii Arhanizacyi pa biaśpiecy i supracoŭnictvie ŭ Jeŭropie (ABSIE) u ramkach Maskoŭskaha miechanizmu, ustupić u źmiastoŭny dyjałoh z usimi častkami hramadstva i pravieści novyja svabodnyja i sumlennyja vybary», — skazana ŭ dakumiencie, pieradaje TASS.
Krainy G7 buduć supracoŭničać u pytańni pryciahnieńnia da adkaznaści asob, jakija majuć dačynieńnie da incydentu z vymušanaj pasadkaj samalota irłandskaj avijakampanii Ryanair u Minsku, na borcie jakoha znachodziŭsia Raman Pratasievič.
«My hłyboka zakłapočanyja napadami z boku biełaruskich uładaŭ na pravy čałavieka, fundamientalnyja svabody i mižnarodnaje prava, prykładam jakich stała prymusovaja pasadka rejsa FR4978 i aryšt niezaležnaha žurnalista i jaho spadarožnicy. My budziem pracavać razam, kab pryciahnuć da adkaznaści asob, jakija majuć dačynieńnie da hetaha, u tym liku z dapamohaj sankcyj, a taksama praciahniem padtrymlivać hramadzianskuju supolnaść, niezaležnyja ŚMI i pravy čałavieka ŭ Biełarusi», — skazana ŭ 25-staronkavym dakumiencie.