Matčy z prystaŭkaj «supier»: što čakaje hledačoŭ u treci dzień čempijanatu Jeŭropy pa futbole
U baraćbu za trafiej ustupiać šeść novych zbornych. Padvyšanuju cikavaść vyklikajuć sustrečy Anhlija — Charvatyja i Niderłandy — Ukraina, piša RBK.
Anhlija — Charvatyja
Łondan. Stadyjon «Uembli», 16:00
Da hetaha zbornyja Anhlii i Charvatyi sustrakalisia vosiem razoŭ. Niahledziačy na toje, što historyja anhlijskaha futboła byccam by jarčejšaja i bahaciejšaja, charvaty praktyčna nie sastupali supierniku — čatyry parazy, ničyja i try pieramohi, u tym liku ŭ paŭfinale apošniaha čempijanatu śvietu.
Niadzielnaja hulnia projdzie na hałoŭnaj arenie jeŭrapiejskaha pieršynstva — «Uembli». Paźniej, 11 lipienia, mienavita na hetym łondanskim stadyjonie, jaki źmiaščaje 90 tysiač hledačoŭ, adbudziecca finał Jeŭra.
Adnojčy charvaty ŭžo pieramahali na «Uembli»: 21 listapada 2007 hoda ŭ adboračnym matčy da Jeŭra-2008. Tady Anhlii patrabavałasia nabrać adno ačko, kab trapić na čempijanat Jeŭropy razam z Charvatyjaj, jakaja ŭžo adabrałasia ŭ finalnuju častku i nie vyrašała ŭ Łondanie nijakich turnirnych zadač. Ale anhličanie prymudrylisia prajhrać 2:3, i zamiest ich na Jeŭra pajechała Rasija.
Pierad majučaj adbycca hulnioj bukmiekiery addajuć adnahałosnuju pieravahu Anhlii. Kaeficyjenty — 1,65 suprać 5,8. Heta łahična. Anhlija — haspadar pola, jana maje samy darahi na turniry skład (aceńvajecca ŭ €1,27 młrd) i ŭvachodzić u lik hałoŭnych favarytaŭ. Praktyčna ŭsie hulcy zbornaj Anhlii znachodziacca ŭ vydatnym pa futbolnych mierkach vieku. Siaredni ŭzrost kamandy 25 hadoŭ i 117 dzion.
Nielha skazać, što ŭ Charvatyi niama šancaŭ. Kamanda vystupić na Jeŭra amal u tym ža składzie, što try hady tamu na čempijanacie śvietu ŭ Rasii. Praŭda, u im nie budzie adnaho z najlepšych hulcoŭ, paŭabaroncy Ivana Rakiciča. Hod tamu na toj momant 32-hadovy futbalist abviaściŭ ab sychodzie sa zbornaj.
Hałoŭny trenier charvataŭ Złatka Dalič imkniecca amaładzić skład, što łahična, bo na suśvietnym pieršynstvie ŭ Rasii siaredni viek charvataŭ pieravyšaŭ 28 hadoŭ. Lidaru kamandy Łuku Modryču ŭ vieraśni spoŭnicca ŭžo 36. Ci pakaža jon na Jeŭra toj ža ŭzrovień hulni, što na suśvietnym pieršynstvie? Tady Modryč byŭ dobry. Pa vynikach 2018 hoda jon atrymaŭ «Załaty miač» — uznaharodu najlepšamu futbalistu hoda.
U cełym Anhlija — Charvatyja — heta adna z samych hučnych hulniaŭ na hrupavym etapie. Tamu zaŭziatary majuć prava čakać cikavaha matču.
Aŭstryja — Paŭnočnaja Makiedonija
Bucharest. Stadyjon «Nacyjanal», 19:00
Zbornyja Aŭstryi i Paŭnočnaj Makiedonii hulali ŭ adnoj adboračnaj hrupie da čempijanatu Jeŭropy. I ŭ haściach (4:1), i doma (2:1) vyjhrali aŭstryjcy, jakija i na hety raz źjaŭlajucca favarytami — 1,8 suprać 5,4, pavodle viersii bukmiekieraŭ.
Makiedonija vyjšła ŭ finalnuju častku čempijanatu Jeŭropy ŭpieršyniu ŭ historyi, prabiŭšysia tudy praz stykavyja matčy. Aŭstryja bolš vopytnaja — u 2008 i 2016 hadach jana ŭdzielničała ŭ Jeŭra, ale z hrupy vyjści nie zmahła, nabraŭšy ŭ abodvuch vypadkach pa adnym ačku.
Uličvajučy, što inšymi ŭdzielnikami hrupy S źjaŭlajucca Niderłandy i Ukraina — kamandy bolš vysokaha ŭzroŭniu, toj, chto prajhraje ŭ matčy Aŭstryja — Paŭnočnaja Makiedonija, praktyčna pazbavicca šancaŭ na trapleńnie ŭ płej-of.
Niderłandy — Ukraina
Amsterdam. Stadyjon «Jochan Kroif Arena», 22:00
Niderłandy i Ukraina praviaduć pieršy aficyjny matč u historyi. Raniej kamandy sustrakalisia tolki ŭ kantrolnych hulniach — pieramoha Niderłandaŭ 3:0 i ničyja 1:1.
Raskład sił pierad matčam hałandcaŭ i ŭkraincaŭ źjaŭlajecca prykładna takim ža, jak napiaredadni sustrečy anhličan i charvataŭ. Niderłandy — favaryty (1,6 suprać 6,2), bo zhulajuć na svaim poli, majuć darahi (€607 młn — vośmaje miesca) skład i ličacca adnymi z hałoŭnych pretendentaŭ na pieramohu ŭ turniry.
Zrešty, znoŭ ža, jak i ŭ vypadku z Charvatyjaj, nie varta skidać Ukrainu z rachunkaŭ. Padčas adboračnaha turniru kamanda apiaredziła dziejnaha čempijona Jeŭropy Partuhaliju, zhulaŭšy ŭničyju 0:0 u haściach i pieramohšy 2:1 doma. Taksama kalektyŭ Andreja Šaŭčenki apiaredziŭ mocnuju Sierbiju, jakaja stała tolki treciaj.
U składzie Ukrainy jość niekalki maładych i talenavitych hulcoŭ, a taksama niekalki mocnych majstroŭ ź viadučych jeŭrapiejskich čempijanataŭ — Rusłan Malinoŭski («Atałanta»), Alaksandr Zinčanka («Mančester Sici») i Andrej Jarmolenka («Viest Chem»). Viadoma, Ukrainie budzie nie chapać paŭabaroncy «Šachciora» Jaŭhiena Kanaplanki, jaki prapuskaje Jeŭra z-za traŭmy. Ale jość strata i ŭ Niderłandaŭ — paškodžańnie ŭ niadzielu nie dazvolić vyjści na pole abaroncu «Juvientusa» Matejsu de Lihtu.
