Jeŭraparłamient zaklikaŭ da novych ekanamičnych i piersanalnych sankcyj suprać Biełarusi
Jeŭrapiejski parłamient zaklikaŭ uvieści dadatkovyja sankcyi suprać Biełarusi i adchilić jaje ad spartyŭnych padziej.
Adpaviednaja rezalucyja była pryniataja ŭ čaćvier 626 hałasami «za», 16 «suprać» i 36 «ustrymalisia». Rezalucyju padtrymali i sacyjalisty, i libierały, i kansiervatary, i zialonyja, i krajnie levyja: redkaje dla Jeŭropy adzinadušša. Heta vynik taho, što ŭ Biełarusi ŭ turmach siadziać praciŭniki dyktatury ad anarchistaŭ da chryścijanskich demakrataŭ.
Rezalucyja zaklikaje Radu ES jak maha chutčej uvieści sankcyi suprać biełaruskich fizičnych i jurydyčnych asob, jakija majuć dačynieńnie da prymusovaj pasadki i vykradańnia ludziej.
Akramia taho, členy Jeŭraparłamienta zaklikajuć da chutkich ekanamičnych i siektaralnych mier, nakiravanych na klučavyja haliny ekanomiki Biełarusi, u pryvatnaści na syravinu i naftapradukty, kalijnuju, mietałurhičnuju i drevaapracoŭčuju haliny.
Rezalucyja taksama patrabuje adchileńnia Biełarusi ad udziełu ŭ mižnarodnych spartyŭnych arhanizacyjach i mižnarodnych mierapryjemstvach, uklučajučy čempijanaty Jeŭropy i śvietu, i Alimpijskija hulni ŭ Tokia.
Deputaty Jeŭraparłamienta taksama zaklikajuć UEFA zabrać pravy na tranślacyju Jeŭra-2020 u BT.
Voś hałoŭnyja punkty rezalucyi.
Dapamoha biełaruskamu hramadstvu:
- Raspracavać usioabdymny płan ekanamičnaj padtrymki budučaj demakratyčnaj, z uładaj, abranaj na svabodnych vybarach, Biełarusi na sumu 3 miljardy jeŭra.
- Pavialičyć padtrymku hramadzianskaj supolnaści, pravaabaroncaŭ i ŚMI.
- ES — pravieści kanfierencyju vysokaha ŭzroŭniu pa vychadzie Biełarusi z kryzisu z udziełam mižnarodnych finansavych instytutaŭ, krain G7, dziaržaŭ-členaŭ i ŭstanoŭ Jeŭrasajuza.•
Ekanomika i biźnies:
- Uvieści ekanamičnyja, siektaralnyja sankcyi suprać kankretnych śfier ekanomiki: nafta i naftapradukty, kalijnaja, staleliciejnaja i drevaapracoŭčaja pramysłovaść.
- Razhledzieć mahčymaść časova adklučyć Biełaruś ad apłatnaj sistemy SWIFT.
- Zaprasić pradstaŭnikoŭ demakratyčnych siłaŭ Biełarusi na samit G7 i samit Uschodniaha partniorstva.
- Jeŭrakamisiju, usie krainy ES, MVF — admovicca ad luboj finansavaj padtrymki režymu.
Incydent z samalotam, rasśledavańnie złačynstvaŭ:
- Nieadkładna vyzvalić Ramana Pratasieviča, Sofju Sapiehu i ŭsich palityčnych źniavolenych.
- Vyvučyć mahčymuju rolu Rasiei ŭ aktach, učynienych biełaruskim režymam.
- Pašyryć sankcyi na adkaznych za incydent z samalotam, a taksama na tych, chto pracuje na prapahandu, u pryvatnaści na Marata Markava, čyju hutarku z Pratasievičam pakazali na ANT.
- Stvaryć Mižnarodny trybunał dla rasśledavańnia złačynstvaŭ u Biełarusi.
- Adchilić Biełaruś ad udziełu ŭ mižnarodnych spartyŭnych mierapryjemstvach, uklučajučy čempijanaty Jeŭropy i śvietu i Alimpijskija hulni ŭ Tokia, a taksama zabrać u Biełteleradyjokampanii pravy na tranślacyju matčaŭ Jeŭra-2020 i pieradać hetyja pravy Biełsatu.
Jeŭraparłamient zajaŭlaje ab niepryznańni Alaksandra Łukašenki jak prezidenta Biełarusi, nazyvaje režym u Biełarusi nielehitymnym i złačynnym i zaklikaje da novych svabodnych vybaraŭ.