Na sinodzie BPC tolki adzin jepiskap prahałasavaŭ suprać adstaŭki Arciemija, a adzin — ustrymaŭsia. Chto jany?
8 červienia sinod Biełaruskaj pravasłaŭnaj carkavy pryniaŭ rašeńnie «adpravić na pakoj» archijepiskapa Hrodzienskaha i Vaŭkavyskaha Arciemija (u śvieckim žyćci Alaksandr Kiščanka). Aficyjnaja pryčyna — stan zdaroŭja ijerarcha.
Archijepiskap Arciemij
«Našaj Nivie» stali viadomyja peŭnyja padrabiaznaści pasiadžeńnia sinoda. Dakładna viadoma, što ŭładyka Arciemij nie pisaŭ prašeńnia ab adstaŭcy, heta była zusim nie jahonaja inicyjatyva. Što tyčycca zdaroŭja, to peŭnyja prablemy, jak u luboha stałaha čałavieka, sapraŭdy jość, adnak paśla niadaŭnich apieracyj stan Arciemija značna palepšaŭ.
Na hety momant u skład sinoda BPC uvachodzić 16 čałaviek: 14 dziejnych ijerarchaŭ, vikarny jepiskap Śvietłahorski Amvrosij, a taksama archijepiskap Fieadosij, jaki znachodzicca na pakoi, a raniej mieŭ kafiedru ŭ Połacku. Miesca jepiskapa Barysaŭskaha pakul volnaje, raniej im byŭ Vienijamin, jaki ciapier mitrapalit Minski i Zasłaŭski.
Arciemija padtrymaŭ tolki archijepiskap Pinski i Łuniniecki Ściafan (u śvieckim žyćci Ihar Korzun). Jamu ŭžo 77 hadoŭ — heta najstarejšy člen sinoda. Taksama viadoma, što archijepiskap Fieadosij ustrymaŭsia.
Archijepiskap Pinski Ściafan. Fota z sajta jeparchii
9 červienia sinod RPC u Maskvie aficyjna zaćvierdziŭ adstaŭku Arciemija. Ciapier jamu pradpisana žyć u Minsku.
Arciemiju 69 hadoŭ. Jon rodam ź Minska. Vučyŭsia ŭ Leninhradskaj duchoŭnaj sieminaryi. Słužyŭ śviatarom u Karelii. U 1982 hodzie viarnuŭsia ŭ Biełaruś. U 1996 hodzie pastryžany ŭ manastva. U toj ža hod staŭ jepiskapam Hrodzienskim i Vaŭkavyskim.
Archijepiskap Arciemij adznačyŭsia pryncypovaj pazicyjaj padčas prezidenckich vybaraŭ 2020 hoda. Na słužbie 16 žniŭnia jon kazaŭ:«Vam na kaleniach treba stajać, za ŭsie falsifikacyi, za tuju chłuśniu». Užo sioleta jon havaryŭ, što «carkva nie pavinna być abyjakavaj, maŭčańniem pradajecca Boh». Pazicyja archijepiskapa Arciemija nie padabałasia mnohim pradstaŭnikam ułady.
