U Hiermanii daśledujuć, jak adčuvajuć siabie ludzi, kali im nie treba zarablać na žyćcio. Vałancioram płaciać dachalery
Štomiesiac na praciahu troch hadoŭ, pačynajučy z červienia, 122 udzielniki novaha niamieckaha daśledavańnia buduć atrymlivać 1200 jeŭra.
Fota Depositphotos.com
Daśledčyki buduć vyvučać u miežach prajekta ŭpłyŭ biezumoŭnaha bazavaha dachodu na žyćcio čałavieka. Zajaŭku na ŭdzieł u daśledavańni moh padać luby paŭnaletni žychar Niamieččyny, niezaležna ad uzroŭniu dachodu, adukacyi i sacyjalnaha stanovišča, piša Der Spiegel.
Daśledčyki adabrali z 2 miljonaŭ achvotnych 122 čałavieki, kožny ź jakich za try hady ahułam atrymaje 43 200 jeŭra — padatak z hetych hrošaj udzielniki płacić nie buduć. Za heta vałancioram treba budzie rehularna paviedamlać pra źmieny ŭ žyćci, pra svaje zvyčki i emacyjny stan. Dla hetaha za try hady ŭdzielnikam treba budzie siem razoŭ zapoŭnić ankietu. Takija ž ankiety buduć zapaŭniać 1380 čałaviek z kantrolnaj hrupy, jakim nie buduć płacić.
Takim čynam aŭtary daśledavańnia spadziajucca vyvučyć, jaki ŭpłyŭ moža mieć biezumoŭny bazavy dachod na niamieckaje hramadstva. Daśledčykaŭ cikavić, jak budzie pavodzić siabie i što budzie adčuvać čałaviek, jakomu nie treba ničoha rabić, kab zarablać na žyćcio. Adny ličać, što ludzi buduć uvieś čas marnavać na prahlad televizara i jeści fastfud, a inšyja pierakananyja, što ŭ ludziej źjavicca mahčymaść zaniacca tym, što ich nasamreč cikavić, biez strachu zastacca bieź finansavych srodkaŭ.
«Dyskusija nakont taho, jak paŭpłyvaje na hramadstva najaŭnaść u ludziej biezumoŭnaha bazavaha dachodu, zasnavanaja tolki na pierakanańniach. My chočam zrabić jaje realistyčnaj i abapiracca na navukovyja źviestki», — tłumačać arhanizatary prajekta na svaim sajcie.
Padčas daśledavańnia aŭtary chočuć daviedacca, jak adabjecca adsutnaść nieabchodnaści pracavać na emacyjnym stanie ŭdzielnikaŭ. Płanujecca, što ŭ vałancioraŭ trojčy voźmuć probu vałasoŭ, kab vyznačyć uzrovień kartyzołu, harmonu stresu, u arhaniźmie.
Sumu, jakuju buduć atrymlivać vałanciory, była raźličanaja z pražytkovaha minimumu i koštu spažyvieckaha košyku ŭ Hiermanii. Prajekt finansujecca z pryvatnych achviaravańniaŭ bierlinskaj hramadskaj arhanizacyi Mein Grundeinkommen e.V., jakaja kaardynuje daśledavańnie. Partniorami prajekta stali aŭtarytetnyja navukovyja arhanizacyi Hiermanii, siarod jakich Instytut niamieckaj ekanomiki, Kiolnski ŭniviersitet i Tavarystva Maksa Płanka.