Piensijanierku aštrafavali na 870 rubloŭ za BČB-šalik
62-hadovaja Zinaida Śmirnova 26 krasavika viartałasia dadomu z mohiłak. Žančyna išła mima Kurapataŭ z abmatanym vakoł pajaśnicy šalikam, jaki joj źviazała jaje mama niekalki hadoŭ tamu.
U hety momant za joj pačali hnacca nieviadomyja, tamu Zinaida ad strachu stała ad ich uciakać, paviedamlajuć pravabaroncy.
— Ja pačała ŭciakać z krykami «Ratujcie, milicyja». Jany dahnali, schapili i skazali, što jany i jość milicyja.
U Savieckim RUUSie na Śmirnovu skłali protakoł pa art. 24.23 KaAP i abvinavacili jaje ŭ adzinočnym pikietavańni pa vulicy Mirašničenki šlacham razmachvańnia BČB-šalikam transpartu, što prajadžaŭ mima, a taksama ŭ vykrykvańni «Žyvie Biełaruś».
31 maja nad piensijanierkaj prajšoŭ sudovy praces, jaki viała sudździa Savieckaha rajona Alena Žukovič.
Na pytańnie sudździ, čamu žančyna pačała ŭciakać, Śmirnova adkazała: «Ja nie viedała, chto heta, na mianie ž nie kožny dzień napadajuć».
Zinaida Dźmitryjeŭna śćviardžaje, što nie kryčała łozunh «Žyvie Biełaruś», bo zamiest hetaha kryčała tolki «Milicyja, dapamažycie».
Vyśvietliłasia, što piensijanierku zatrymlivali supracoŭniki AMAPa. Sa słovaŭ śviedki vynikaje, što chtości paviedamiŭ u milicyju pra toje, što pa trasie idzie žančyna i razmachvaje BČB-šalikam. Ale ŭ pratakole ahladu napisana, što «abjektam ahladu źjaŭlajecca šalik, zaviazany na pajaśnicy Śmirnovaj». Šalik z žančyny ŭsio ž taki źniali, kab jaho sfatahrafavać.
Važna adznačyć, što na samaj spravie šalik prosta maje bieły i čyrvony kolery, ale jon nie ŭ BČB-rasfarboŭcy: na kožnym krai biełaha šaliku było try čyrvonyja pałoski roznaj taŭščyni.
Sudździa Žukovič pryznała Zinaidu Śmirnovu vinavataj i aštrafavała jaje na 870 rubloŭ (30 bazavych).
