Vyjhrała stypiendyju ŭ niamieckim univiersitecie, stała praryvam hoda redakcyi. Raskazvajem pra žurnalistku Luboŭ Kaśpiarovič, jakoj dali 15 sutak
Žurnalistku Tut.by Luboŭ Kaśpiarovič asudzili na 15 sutak. Jaje zatrymali ŭ piatnicu 14 maja, kali jana brała intervju ŭ siabroŭ studentaŭ, spravu jakich u toj dzień razhladali ŭ Domie pravasudździa. Raskazvajem pra hetu dziaŭčynu, jakaja ciapier siadzić na Akreścina za svaju pracu.
Fota z sacyjalnych sietak Lubovi
Lubovi 28 hod. Jany vyrasła ŭ vioscy Milejki Ivacevickaha rajona ŭ vialikaj siamji — ich u baćkoŭ troje dačok. Luboŭ — małodšaja ź siaścior.
Instytut žurnalistyki BDU dziaŭčyna skončyła z čyrvonym dypłomam. A paŭhoda studenckaha žyćcia praviała ŭ Hiermanii — vyjhrała stypiendyju ŭ Rurskim univiersitecie ŭ Bochumie. Toj vopyt jaje vielmi natchniŭ — pierš za ŭsio atmaśfieraj svabody. Navučalnyja kursy vybiraješ samastojna, prysutnaść ci adsutnaść studentaŭ na parach adznačać zabaroniena, a rektar moža raźlivać hlintviejn na ŭvachodzie ŭ biblijateku i zaprašać na vybary ŭ studenckaje samakiravańnie.
Paśla žurnalistka skončyła mahistraturu ŭ BDU. Paralelna jana viała ŭ pieršych kursaŭ pary pa vypusku vučebnaj haziety.
Peŭny čas Luboŭ była redaktarkaj sajta «Adukacyja. Info». Heta płatforma z navinami pra stypiendyi na vučobu dla biełarusaŭ za miažoj. Dziaŭčyna i sama šmat času pryśviačała raźvićciu. Jana jeździła na žurnalisckija sieminary i inšyja adukacyjnyja prahramy ŭ ZŠA, Litvu, Livan (u apošniuju krainu Luboŭ trapiła ŭ niespakojnym 2019-m — padčas zabastovak i pratestaŭ). Adzin z takich kursaŭ adnojčy zanios jaje na Paŭnočny Kaŭkaz.
Žurnalistka supracoŭničała taksama z partałam «Imiena».
U štacie Tut.by jana z 2018 hoda. Piša dla raździełaŭ «Hramadstva» i «Kruhahlad». Letaś na vialikaj latučcy redakcyja pryznała žurnalistku praryvam hoda.
Luboŭ — vielmi staranny i addany spravie čałaviek. Voś tolki dźvie historyi, jakija śviedčać pra heta:
- Stypiendyju na vučobu ŭ Hiermaniju dziaŭčyna ŭ pieršy raz nie atrymała. Ale nie zdałasia, stała ŭzmocniena padciahvać niamieckuju movu — naviedvała pa čatyry zaniatki na tydzień. Plus niefarmalnyja mierapryjemstvy ŭ instytucie Hiote. I heta aproč vučoby va ŭniviersitecie i padpracoŭki žurnalistam.
- Dla artykuła pra paŭstancaŭ-paplečnikaŭ Kastusia Kalinoŭskaha Luboŭ doŭha šukała infarmacyju. Adzinaja kniha ź bijahrafijaj usich udzielnikaŭ była na litoŭskaj movie. Kab atrymać jaje, žurnalistka źviazałasia z prafiesaram, što jaje składaŭ. A paśla z dapamohaj huhł-pierakładčyka vyvučała materyjał.
U volny čas Luboŭ lubić padarožničać, niańčycca ź plamieńnikami. U dadatak da niamieckaj jana vyvučyła anhielskuju movu.
Dziaŭčyna adličvała dni da sustrečy sa svajoj kalehaj Kaciarynaj Barysievič, jakuju 19 maja musiać vyzvalić. A ciapier sama apynułasia za kratami.
Na sudzie Luboŭ šmat razoŭ źviartała ŭvahu na parušeńnie zakonu — jaje nie aznajomili z pratakołam, śviedka, jaki vystupaŭ pad kodavym imiem Ivanoŭ, uvieś čas znachodziŭsia ź joj u adnym pamiaškańni i čuŭ chod spravy, jaje praciahvali ŭtrymlivać u izalatary pa zakančeńni 72 hadzin. Ale sudździa Siarhiej Kacar paličyŭ heta niaznačnym.
«Luba cudoŭna trymałasia, jana razumnička. Ja hanarusia joj», — kaža siastra žurnalistki.
Masavyja zatrymańni kala suda pa «Spravie studentaŭ»
«Upieršyniu čuju, u čym mianie abvinavačvajuć»: u Minsku pačaŭsia sud nad žurnalistkaj Tut.by Kaśpiarovič
Žurnalistku Tut.by Luboŭ Kaśpiarovič pakarali aryštam na 15 sutak
