Kiejs: padpałkoŭnik KDB atrymaŭ bitkojn. Jak hety dachod možna kanfiskavać?
U filmie ANT «Mankurty» raskazvajecca, što padpałkoŭnik KDB Alaksiej Chrałovič vysłaŭ u telehram-kanały aŭdyja razmoŭ, jakija pralivali śviatło na hibiel Ramana Bandarenki, za što atrymaŭ bitkojn. Ciapier Chrałovič zatrymany. U teoryi, kali sprava dojdzie da suda, niezakonna atrymany dachod musiać kanfiskavać. Ale jak heta mahčyma zrabić z kryptavalutaj? Pasprabavali razabracca ŭ niezvyčajnym kiejsie.
Pieršy varyjant — kanfiskavać bitkojn jak jon jość.
«Nie cikaviŭsia, ci jość u viedamstvach aficyjnyja kryptakašalki, ale kali ŭ čałavieka zastaŭsia bitkojn na rachunku i jon hatovy jaho viarnuć u niaźmiennym stanie, to čamu nie? Zabrać u naturalnym vyhladzie i realizavać sudovymi vykanaŭcami na tarhach. Dumaju, heta budzie nietryvijalnaja praktyka. Zakanadaŭča takaja mahčymaść jość», — razvažaje juryst Michaił Kiryluk nad umoŭnym kiejsam.
Druhi varyjant — kanfiskavać košt bitkojna na momant jaho pieravodu.
Michaił Kiryluk zaŭvažaje, što dla suda heta bolš prosty šlach. Častka 2 artykuła 46-1 praduhledžvaje, što kali kanfiskavać majomaść ci dachod, atrymanyja złačynnym šlacham, niemahčyma praź ich stratu, źniščeńnie ci inšyja pryčyny, to ŭ dachod dziaržavy spahaniajecca suma, ekvivalentnaja ich koštu.
