Jak skłaŭsia los zakachanych paračak z vokładki «Našaj Nivy» za 2013 hod?
Vosiem hod tamu «Naša Niva» prapanavała zakachanym param sfatahrafavacca dla vokładki haziety. Tady byŭ blask u vačach i piaščota ŭ abdymkach. Ci razam jany dahetul, što źmianiłasia ŭ ich žyćci? Raskazvajem.
Maksim i Volha
Maksim i Volha ŭ šlubie ŭžo 23 hady. Dzieci vyraśli: dačce 17 hod, synu 20. Płanujuć być prahramistami — pa prykładzie baćki.
Maksim zhadvaje, jak jany z žonkaj paznajomilisia:
«Vielmi cikavaja historyja była. My ź siabram vyrašyli paźbirać aniekdoty na vulicach Minska, kab paznajomicca ź dziaŭčatami i dobra pravieści čas. Uziali dyktafon, pradstaŭlalisia žurnalistami niejkaha satyryčnaha vydańnia. Naśmiajalisia i zaadno paznajomilisia. Z taho času my z Volhaj pačali sustrakacca».
U volny čas para lubić vandravać. Da pandemii ŭdavałasia naviedać da 14 krain za hod! Siamja samastojna składała maršrut, kab za adnu pajezdku achapić niekalki krain.
«Najbolš jaskravaja vandroŭka — u Paŭdniovuju Aziju, kali my naviedali Sinhapur, Małajziju, Indaneziju. Tam zusim inšaja kultura, vielmi pryhoža. A kali jeździli ŭ Braziliju, karnavał zmahli pabačyć, na vadaspady Ihuasu i Amazonku patrapili», — dzielicca mužčyna.
Sa śniežnia para žyvie ŭ Vilni (dzieci-studenty zastalisia ŭ Minsku). IT-kampanija, u jakoj pracuje Maksim, adkryvała ofis u Litvie — jany i pierajechali.
«Ja vyrašyŭ, što lepš nie płacić padatki Biełarusi. U maim razumieńni padatki — heta damoŭlenaść, što dziaržava niejki servis akazvaje, i my za heta płacim. Ale mianie zusim nie zadavalniajuć tyja servisy».
Volha zvolniłasia ź Dziaržfiłarmonii, dzie była skrypačkaj, źbirajecca šukać novuju pracu ŭ Vilni. Pakul tam łakdaŭn, muzykanty siadziać pa damach.
U čym sakret tryvałych adnosin?
«Dumaju, treba kłapacicca adno pra adnaho i adkryvać u žyćci cikavyja momanty razam. Važna pavažać unikalnaść čałavieka. Viadoma, što adnosiny sami saboj nie dajucca i treba zhładžvać niejkija momanty — nieparazumieńni byvajuć, heta žyćcio», — razvažaje Maksim.
Andrej i Viktoryja
U 2013-m jany byli studentami BDU. Sustrakalisia ad pačatku vučoby — i razam dahetul.
Para žyvie ŭ Minsku. Vypuścilisia sa śpiecyjalnaści «farmaceŭtyčnaja dziejnaść» i zastalisia ŭ hetaj halinie.
«Ja pracuju chimikam na farmaceŭtyčnym pradpryjemstvie, a Andrej — ekśpiertam. Tamu ŭ nas časam adbyvajucca nievialikija sprečki pa prafiesijnych pytańniach. Na ščaście, heta, badaj, adzinaja nahoda dla sprečak», — raspaviadaje Viktoryja.
Z Andrejem jany vučylisia ŭ adnoj hrupie. Spačatku siabravali i razam rychtavalisia da sieminaraŭ, ni pra jakija ramantyčnyja adnosiny nie dumali, ale praź niejki čas pačućci prabilisia vonki.
Para jašče nie ŭ šlubie.
«Z hetym pytańniem my nie śpiašajemsia, bo ŭ nas jašče zašmat rok-n-rołu, — uśmichajecca Viktoryja. — U adnosinach cenim, pierš za ŭsie, pavahu da asabistych intaresaŭ, nichto nie sprabuje naviazvać adno adnamu svaje žadańni, adsutničajuć jakija-niebudź zabarony, kab była mahčymaść zastavacca volnym u svaim vybary.
Ja caniu ŭ Andreju zdolnaść zachoŭvać spakoj u luboj situacyi, umieńnie zhładžvać kanflikty — tut jaho ratuje pačućcio humaru. A Andrej skazaŭ, što cenić maju zdolnaść ruchać jaho napierad i mahčymaść zaŭsiody kazać jak jość».
Ihar i Volha
Studenty na toj momant sustrakalisia try hady. Źbiralisia padavać zajavu ŭ ZAHS. Nie dajšli — para raspałasia.
«Prajšło kachańnie, nijakaj asablivaj pryčyny niama», — tłumačyć Volha.
Para razyšłasia praz hod ci paŭtara paśla taho fota. Apošni čas da rasstavańnia jany mała stasavalisia — nie stelefanoŭvalisia i nie bačylisia tydniami. Choć u niejki momant sapraŭdy byli dumki ažanicca.
Dziaŭčyna ciapier sumiaščaje pracu pierakładčyka i repietytara — pa anhielskaj i šviedskaj movie. Znachodzicca ŭ inšych adnosinach.
«Vieru, što kožnamu pryznačana druhaja pałova. U adnosinach šukaju ščyraść, kłopat i ŭvahu. Taksama važna, kab z čałaviekam było lohka i viesieła», — dzielicca Volha.
Volha i Ihar ciapier
Ihar uspaminaje, što dziaŭčyna syšła, bo zachacieła być ź inšym.
«Kali razyšlisia, to dni try padtrymlivaŭ vytvorcaŭ śpirtnych napojaŭ», — žartuje chłopiec.
Jon pracuje ŭ Akademii navuk, u halinie paraškovaj mietałurhii. Paśla vajskovaj słužby była mahčymaść zastacca ŭ armii, ale nie zachacieŭ. Dva hady tamu ažaniŭsia, haduje maleńkaha syna.
***
Čaćviortaja para — Vijaleta i Ściapan. Minčuki, u 2013-m jany byli pieršakurśnikami BDU. Pra ich los my nie zmahli daviedacca. Kali na hetym fota vy ci vašy znajomyja, napišycie, kali łaska, u telehram-bot @NashaNivaBot.
