18-hadovy palitviazień uziaŭ vinu na siabie, ale i jaho siabroŭku nie vyzvalili. Zirnicie, jak jon maluje
Siarod čatyroch socień źniavolenych za palityku ŭ Biełarusi — troje zusim maładych, 18-hadovych. Dvaich ź ich, Safiju Małaševič z Mazyra i Cichana Klukača z Bresta, akurat ciapier sudziać. Padčas śledstva Cichan braŭ vinu na siabie, spadziejučysia takim čynam advieści padazreńni ad dziaŭčyny. Biespaśpiachova: i jaho, i jaje nie vyzvalili.
Abvinavačvajuć ich u naniasieńni 6 vieraśnia nadpisaŭ z bałončyka na ščyty sistemy «Rubiež», jakuju vystavili suprać mirnych demanstrantaŭ u Minsku, što pratestavali suprać falsifkacyi vybaraŭ i biezzakońnia.
U inšych jeŭrapiejskich krainach za takoje dziejańnie pahražała b maksimum administracyjnaje pakarańnie, kažuć pravaabaroncy. I Cichana, i Safiju pryznali palityčnymi viaźniami.
Jak i mnohija palitviaźni, Cichan — šmatbakova adorany čałaviek. Jon jašče i maluje.
Voś jakija malunki atrymaŭ u liście ad Klukača bieraściejec Ihar Baranoŭski, jaki, tak supała, siadzieŭ razam ź im niejki čas u Stolinskim IČU.
Siarod malunkaŭ — partret kiraŭnika Paŭstańnia 1863-64 hadoŭ Kastusia Kalinoŭskaha. Maluje Cichan na tych arkušykach, jakija tolki jamu dastupnyja.
Napisać ci adpravić telehramu Cichanu Klukaču možna na adras: Śledčaja turma 8, vulica Savieckaja 22a, Žodzina 222163.
«Spravy ŭ mianie niadrenna, — piša Cichan Klukač. — nastolki niadrenna, nakolki heta ŭvohule moža być u hetych ścienach. Horš za ŭsio toje, što niama mahčymaści čytać, bo nie dajuć pieradać knihi», — piša Klukač u liście.
«Mianie aburaje sacyjalnaja niespraviadlivaść». Pačaŭsia sud pa spravie 18-hadovaj Safii, jakaja raśpisała «Rubiažy»
